IGAPE, AJE Ourense e Tecnópole impulsan un polígono industrial virtual

luns, 10 de xaneiro do 2022 S. P.

A nosa terra contará cun polígono virtual que permita ás pemes e ás persoas autónomas contar cos servizos que lles facilitaría a sede física dun complexo industrial (xestión directa e inmediata con clientes e provedores, servizos en liña de asesoramento profesional) pero coas vantaxes que poñen en xogo as contornas dixitais. A posta en marcha desta iniciativa foi acordada co remate de 2021 polo Consello da Xunta, que aprobou un convenio de colaboración entre o IGAPE, AJE Ourense e o Parque Tecnolóxico de Galicia – Tecnópole, con vistas a dar forma definitiva ao proxecto virtual.
O acordo, que conta cun orzamento de 175.220 euros, permitirá ofertar servizos de alto valor engadido no eido da dixitalización a un máximo de 300 beneficiarios, na procura “de dar resposta á necesidade do sector empresarial galego de adaptarse e construír empresas dixitalmente competitivas”, sinalou o IGAPE, engadindo que o polígono virtual estará localizado na Tecnópole (San Cibrao das Viñas) e que dende alí “ofrecerá ás empresas distintos produtos de dixitalización como a creación dunha plataforma dixital, un servizo de hospedaxe web e dominio adaptados a cada un dos usuarios en función das súas necesidades, ou a creación dun espazo de traballo para profesionais no que dispoñan dun conxunto de solucións na nube”.
A esta oferta engádense os servizos de asesoramento e a posta en marcha doutras actuacións complementarias como o deseño e produción de elementos gráficos para a execución de campañas comunicativas, o rexistro da marca ou a elaboración de estratexias de comunicación en distintas canles.

PUBLICIDADE