Ikea comercializa un altofalante con forma de gato lila

A colección Grejsimojs de Ikea é bastante curiosa, incluíndo produtos como unha solución de almacenaxe con forma de gato ou unha lámpada de mesa conforma de can azul, e agora amplíase cun altofalante Bluetooth portátil con forma de rato, deseñado para combinar xogo, música e funcionalidade no fogar. O dispositivo, dispoñible en cor lila por un prezo de 14,99 euros (IVE incluído), está pensado como un complemento lúdico tanto para nenos como para adultos, cun enfoque claro na creatividade e na experiencia compartida.
O altofalante permite reproducir música e podcasts desde smartphones, ordenadores ou outros dispositivos compatibles con Bluetooth. Encaixa cun uso cotián no cuarto infantil ou en calquera espazo da casa, onde a música se converte nun estímulo para o movemento, o xogo e a socialización.
O dispositivo ofrece unha potencia total de 2 watts, cun único altofalante de rango completo de 1,6 polgadas e un rango de frecuencias que vai dos 150 aos 19.000 Hz. A autonomía alcanza ata 24 horas cun volume ao 50 %, e conta con protección IP44 fronte a salpicaduras. Incorpora unha función multi-altofalante que permite sincronizalo con outros dispositivos compatibles para reproducir música de maneira simultánea en varios puntos da casa.
As súas dimensións son compactas (8,6 centímetros de ancho, 13 de longo e 9 de alto), o que facilita o seu transporte (ao que tamén axuda a súa correa-rabo) e uso en diferentes espazos.
No momento de escribir estas liñas figura dispoñible en varios territorios europeos nos que ten presenza Ikea, pero aínda non está dispoñible na rede de tendas en España.