Imatia ultima os detalles da plataforma que lle planta cara ao illamento da terceira idade
martes, 16 de abril do 2019
O
proxecto europeo Senior-TV,
impulsado pola empresa galega Imatia para impulsar a autonomía e a
calidade de vida das persoas maiores, vén de entrar na recta final
en materia de desenvolvemento e materialización definitiva. De
feito, a finais de marzo
celebrou sen Bucarest a derradeira asemblea xeral do proxecto, na que
participaron Sira López, Yago Martínez e Cibrán Ledo, todos
membros do equipo de Imatia. Durante a xuntanza presentouse a
versión final da plataforma e debateuse arredor dos resultados
iniciais do terceiro piloto.
Senior-TV,
como lembraremos, é unha iniciativa para crear unha plataforma
aberta de televisión interactiva orientada a maiores de 65 anos que
viven soas nos seus propios fogares. Nela inclúense servizos formais
e informais (Novas, Eventos, Tempo) cuxo obxectivo é a mellora da
calidade de vida dos maiores, reducindo o seu illamento e promovendo
unha vida activa e saudábel. Esta plataforma, adaptada a
televisores, smartphones e tabletas, permitirá que as persoas
maiores poidan acceder desde as súas propias casas a un conxunto de
servizos sociais e de saúde, “o que facilitará o seu propio
coidado e aumentará a súa inserción familiar e comunitaria”,
explican fontes da empresa galega.
A
día de hoxe o proxecto atópase realizando o terceiro piloto con
persoas maiores de tres países: Chipre, Eslovenia e Romanía.
Durante este piloto está a probarse a versión final da plataforma,
a cal, ademais dos servizos de control de parámetros de saúde,
inclúe servizos informais como o acceso a redes sociais,
vídeo-conferencia, acubillo de vídeos, acceso a noticias e eventos
ou xogos de rehabilitación cognitiva e lecer.
Segundo
engade a firma galega, trátase do primeiro proxecto no que participa
a través dunha convocatoria europea. Están mergulladas no mesmo
empresas de até cinco países, amais de Imatia: Gluk Advice
(Holanda), Compexin SA CPX (Romanía), Dom upokojencev Nova Gorica
DUNG (Eslovenia), Development Centre of Information and Communication
Technologies Savinja RC-IKTS (Eslovenia), Ana Aslan International
Foundation (Romanía) e Strovolos Municial Multi-Functional
Foundation SMMFF (Chipre).