Inaúgurase o Programa de Atracción de Talento para as empresas galegas

A compostelá Cidade da Cultura acollía na mañá de hoxe, luns 23 de setembro, a apertura da primeira das mesas de traballo do Programa de Atracción de Talento nas empresas galegas, que se celebrarán dende hoxe e até o vindeiro mércores. Ao acto inaugural asistían o conselleiro de Emprego, Comercio e Emigración, José González e a directora xeral de Formación e Cualificación para o Emprego, Zeltia Lado.
Dicir que estas xornadas, nas que participarán os sectores metalmecánico, construción, agroalimentario, turístico, TIC (Tecnoloxías da Información e a Comunicación) e loxístico, atópanse inseridas nas liñas de acción que está a promover a Xunta coa finalidade de coñecer as necesidades específicas de persoal do tecido produtivo galego, identificar as barreiras de acceso a man de obra (especialmente da estranxeira), e informar sobre as diferentes vías e recursos que ten en marcha a Administración autonómica para facilitar a incorporación ao mercado laboral da colectividade galega do exterior e de persoas estranxeiras. Asemade, búscanse detectar as carencias do catálogo de postos de difícil cobertura, coa idea de propoñer a súa actualización ao Goberno central.