Incrementan a produción da SNES mini para evitar a expeculación

O 29 de setembro sairá á venda a Nintendo Classic Mini: Super Nintendo Entertainment System, máis coñecida como SNES mini, e dende o seu anuncio espertouse unha febre retro de usuarios querendo garantir a reserva da súa pequena consola nostálxica para que non se repita o que aconteceu coa súa predecesora, a NES mini, que apenas puido verse nas tendas, por terse esgotado rapidamente e cesar a súa produción moi rápido pese a anunciarse que non era unha consola de edición limitada.
Pero a idea de que estas consolas provocan especulación molesta moito a Nintendo, e o responsable da compañía nipoa nos EE.UU., Reggie Fils-Aimé, declarou que «incrementaron drasticamente» a produción da nova consola para evitar a revenda en eBay a prezos abusivos.
En calquera caso espérase que a SNES mini sexa unha das máquinas máis vendidas no que resta de ano, pero cómpre lembrar que o seu prezo de venda oficial é de 79,99 euros, polo que non debería pagarse moito máis para facerse cun destes produtos que non só é un hardware interesante (por conservar a aparencia externa da SNES orixinal, pero cun tamaño inferior) senón tamén polos 21 xogos precargados que inclúe entre os que non faltan auténticos imprescindibles como Donkey Kong Country, Super Metroid, Super Mario Kart ou Super Street Fighter II Turbo: Hyper Fighting.