Influencers galegos inauguran a tempada de visitas en CLESA

A iougurtería galega CLESA, integrada na Cooperativa Rural Galega CLUN e con sede no municipio pontevedrés de Caldas de Reis, reabriu as súas portas na volta ao cole con visitas para escolares e grupos. Ao abeiro do inicio do ano académico, a empresa puxo en marcha neste curso escolar unha nova edición do programa O tour do iogur. Para inaugurar a tempada de visitas, este mércores visitaron a planta catro recoñecidos influencers galegos, Alvientooo, Ana e Marcos de La cocina es vida e Bea Sanfa. Achegóuselles un percorrido didáctico que percorreu todos os elos da cadea de produción da empresa: dende dende a chegada do leite directamente de ganderías socias da cooperativa ata a elaboración e envasado. Foi unha experiencia conducida por Amparo Porto, xefa de calidade da planta.
Un dos puntos estrela foi a cata de produtos dirixida polo equipo de desenvolvemento de produto. Os iogures gregos de gran formato de CLESA, o último lanzamento da marca, sorprenderon aos visitantes pola súa calidade e a súa cremosidade.
O tour do iogur é o nome que reciben as novas visitas a CLESA dirixidas a colexios e grupos organizados. “É unha nova experiencia moi entretida que conta con murais, con degustacións e con actividades a proba de chefs”, informaron dende a iogurtería, lembrando que a marca leva realizando visitas ás súas plantas dende os seus orixes: “O coñecemento da transformación do leite e a divulgación dunha alimentación saudábel, foi sempre un compromiso da compañía”.
Para este novo curso, xa está aberto o prazo para reservar as visitas. Colexios e grupos organizados xa poden realizar as súas reservas escribindo a visitas@clun.es ou chamando ao 600 79 43 68. Celebraranse todos os xoves en horario de mañá, e é imprescindíbel reservar.