Instagram permitirá reorganizar as publicacións no perfil e compartir música de Spotify nas Notas

Instagram está a anunciar un ambicioso plan para impulsar a creatividade na plataforma, incorporando novas funcións pensadas para reducir a presión á hora de publicar e facilitar a expresión artística, ao tempo que lanzan iniciativas para apoiar a novos talentos a través de financiamento e colaboracións.
Entre as novidades destaca a posibilidade de publicar contido sen que apareza directamente no feed dos seguidores, así como a opción de reorganizar as publicacións no perfil. Tamén se amplía o acceso aos Reels de proba, que permiten probar vídeos curtos con usuarios que non seguen a conta, co obxectivo de eliminar o medo ao fracaso e fomentar a experimentación. Segundo datos da compañía, un 40 % dos creadores publicaron máis tras probar esta opción e, entre eles, o 80 % logrou aumentar o alcance dos seus contidos.
No ámbito das ferramentas, a aplicación Edits continúa mellorando con funcións como restyle, que permite modificar o estilo visual dos vídeos mediante intelixencia artificial. Tamén se introducirán novidades lixeiras como unha fonte manuscrita de Rosalía para Stories e Reels, ou a integración con Spotify para compartir cancións nas Notas.
Ademais, Instagram lanza Drafts, un programa que investirá en creadores emerxentes ofrecéndolles apoio económico, unha rede de contactos e espazos de co-creación para desenvolver os seus proxectos. Esta iniciativa busca consolidar Instagram como un espazo onde dar o primeiro paso creativo sexa máis fácil e seguro.
A rede social tamén iniciou unha campaña audiovisual centrada no poder de asumir riscos creativos, con protagonistas como Rosalía, Tyler, The Creator ou Fred Again.., que compartirán as súas experiencias inspiradoras sobre como empezaron.