Intel estrea novas cámaras de profundidade

Nos últimos anos foron varios os proxectos que tiraron proveito das cámaras RealSense de Intel para, por exemplo, recoñecemento facial para equipos co Windows 10 ou para permitir que os drons poidan evitar choques realizando un modelo tridimensional do seu contorno, demostrando que o uso de cámaras de profundidade pode ir moito máis aló dos videoxogos (lembremos que esta tecnoloxía garda semellanzas co sensor Kinect da Xbox), e para que poidan continuar a innovación baseada nesta tecnoloxía Intel comezou hoxe a distribución dun par de novas cámaras, as Intel RealSense D415 e D435, que engaden capacidades 3D a prototipos ou incluso a equipos finais.
Estas cámaras son de grande utilidade para makers e educadores, entregándose nun formato moi sinxelo, xa que chega con conectalas a un ordenador por USB para poder empregalas, estando soportadas polo Intel RealSense SDK 2.0, un kit de desenvolvemento de código aberto que facilita a creación de solucións baseadas nestas cámaras que poden empregarse tanto en interiores como en exteriores.
Esta tecnoloxía de Intel pode adquirirse tanto para solucións puntuais como para a integración en produtos con grandes volumes de fabricación, sendo unha solución de visión artificial que pode favorecer os avances en realidade virtual e aumentada, en robótica, e drons e en moitos outros ámbitos.
A cámara de profundidade Intel RealSense D415 pode xa reservarse a un prezo de 149 dólares, mentres que a Intel RealSense D435, cun campo de visión máis amplo, ten un prezo de 179 dólares. En calquera dos casos aseguran que a demanda destes produtos é moi elevada, polo que a súa entrega pode adiarse un chisco.