Internaco presenta no Campus Terra os últimos avances en agrotech

O grupo galego Internaco, con sede en Ordes, protagonizará unhas xornadas sobre agrorobótica organizadas esta semana pola Escola Politécnica Superior de Enxeñería (EPSI) do Campus Terra, da Universidade de Santiago (USC). O obxectivo, en palabras da empresa, é “trasladar aos alumnos do Grao de Robótica de Lugo (único en España) e a estudantes de disciplinas relacionadas con este ámbito a importancia da innovación na agricultura do futuro, así como as perspectivas que se abren coa implantación da robotización nos traballos do campo”.
Segundo engade o grupo sobre os porqués desta xornada, “o futuro do sector agrícola pasa sen dúbida pola innovación, e neste contexto a agrorobótica preséntase como un sector en clara expansión cunhas perspectivas dun rápido crecemento”.
Con este enfoque, a Escola Politécnica Superior de Enxeñería do Campus Terra elixiu a Internaco para protagonizar a xornada de portas abertas que se celebrará o vindeiro mércores, 19 de xullo, no salón de actos da EPSI de Lugo.
O programa desenvolverase desde as 9.30 horas.
Trátase dun ciclo de conferencias e demostracións prácticas nas que Internaco trasladará aos asistentes a súa longa experiencia no sector da innovación e a dixitalización do sector agrícola, forestal e de xardinería. “Trátase dunha aposta pola modernización na que levamos profundando desde o noso nacemento, hai xa case 50 anos a través de marcas líderes como a sueca Husqvarna e a través da empresa AG/AG Group”, indican.
Internaco, en concreto, mostrará a súa visión sobre a robotización dos traballos relacionados coa agricultura e a xardinería, así como as perspectivas de futuro sobre a súa implantación en España.
Para iso, Sergio Grau, director de vendas de AG/AG Group, fará unha presentación do grupo empresarial creado en 1976 e especializado na comercialización de solucións innovadoras, competitivas e de calidade, con produtos e servizos orientados ao coidado de espazos naturais a través dunha ampla e especializada rede de distribución. A súa aposta pola agrorobótica reforzouse nos últimos anos coa incorporación de marcas de referencia no sector. Unha das máis significativas é a sueca Husqvarna, que destaca no dito ámbito de traballo coa súa liña de robots Husqvarna Automower, que ofrece solucións para cada tipo de céspede dun modo sustentábel e respectando a biodiversidade en cada espazo.
As conferencias contarán tamén coa presenza de Carlos Rivera (xestor de produto de Automower), que centrará o seu relatorio na modernización, a evolución e o futuro da robótica no sector do campo e xardín.
A xornada completarase con outras dúas intervencións sobre a innovación no ámbito da horticultura e o viñedo a través da presenza de representantes de AG/AG Group, que forma parte do grupo Internaco desde 2022.
Pola súa banda, Josep Dalmases e Sophie Graillot abordarán aspectos destacados dos robots agrícolas das marcas FramDroid e Naïo que AG/AG Group distribúe en España e Portugal.
Ademais dos relatorios, as xornadas organizadas pola Escola Politécnica Superior de Enxeñería de Lugo inclúen, a partir das 12.30 horas, demostracións que se realizarán nos campos de prácticas da EPSI. Os asistentes poderán ver en funcionamento dous dos robots fabricados pola empresa francesa Naïo Technologies: o modelo TED, para traballos en plantacións de viñedo, e o modelo OZ, para tarefas en explotacións hortícolas.