Investigadoras/es do CITIC participaron en estadías en prestixiosas universidades de EE UU
luns, 4 de setembro do 2017
- A investigadora do CITIC, Marta Martínez
Ao
longo deste verán, investigadoras/es
do Centro de Investigación en Tecnoloxías da Información e as
Comunicacións (CITIC) da Universidade da Coruña foron regresando de
estadías breves de investigación en prestixiosas universidades
norteamericanas (Estados Unidos). Estas
estadías están co-financiadas pola axuda de Centros Singulares de
Investigación 2016-2019, financiada pola Xunta de Galicia e o Fondo
Europeo de Desenvolvemento Rexional (FEDER). Os investigadores
coincidiron en afirmar que esta experiencia supuxo para eles “unha
excelente oportunidade” para ampliar coñecementos na súa área
científica e mellorar a súa competencia investigadora en
universidades de referencia internacional.
Marta
Benítez García (Universidade
de Minnesota)
A investigadora Marta Benítez García realizou unha estadía de
cinco meses na Universidade de Minnesota. O obxectivo da súa viaxe
foi aplicar técnicas de post-procesado na simulación numérica de
diferentes problemas de interese, en particular problemas de
convección-difusión escalares 1D e 2D. O traballo desenvolvido
estivo dirixido polo profesor Bernardo Cockburn, especialista na
aplicación e a análise destas técnicas.
O balance que Marta fai da súa presenza na dita institución
académica dos Estados Unidos é o seguinte: “Tanto a nivel
profesional como persoal, a experiencia foi gratificante. A nivel
profesional traballei nun tema novo para min, como foi o uso de
técnicas de prost-procesado. Pareceume interesante familiarizarme co
emprego destes recursos e poder aplicalos a métodos numéricos nos
que teño experiencia. Tamén me gustou participar nos seminarios
semanais organizados polo profesor Bernardo Cockburn, e nun deles
tiven a oportunidade de realizar unha charla. Ademais, a idea é que
esta colaboración que se iniciou coa miña estadía, prosiga”.
Respecto ao aspecto máis persoal da súa presenza na Universidade de
Minnesota, engade: “O ambiente alí é moi bo, hai unha chea de
estudantes, o campus paréceme precioso, a cidade tamén, e a xente é
moi amable e educada. Eu vivía no campus, é un sitio moi tranquilo
no que hai moita natureza. É certo que houbo algúns meses da miña
estadía nos cales non había clases e estaba todo bastante deserto,
isto foi o peor da miña experiencia alí, a soidade nestes meses. No
meu caso particular, nunca antes fixera estadía algunha no
estranxeiro aínda que sempre me parecera algo importante e despois
desta experiencia, aínda máis. Por outra banda, estar soa nun país
estranxeiro, cun idioma diferente, con dinámicas distintas, resultou
ser finalmente un gran reto persoal. Polo tanto, no meu caso, esta
experiencia foi enriquecedora tanto a nivel profesional como
persoal”.
- Inés Barbeito, segunda pola esquerda, cos seus compañeiros de departamento da UCSD
Inés Barbeito Cal: Universidade de California, San
Diego (UCSD)
Pola súa banda, Inés Barbeito Cal realizou unha permanencia de tres
meses de duración na Universidade de California, San Diego (UCSD).
As súas investigacións centráronse no eido da estatística, máis
polo miúdo na estatística non paramétrica. De maneira específica,
os seus estudos encadráronse no contexto da estimación non
paramétrica da densidade condicional baixo dependencia temporal dos
datos. Os traballos de investigación desenvolvidos por Inés foron
supervisados polo profesor Politis, creador do Bootstrap
Estacionario, un dos métodos clave para a tese doutoral que realiza
a investigadora.
Como froito da súa estancia prevese a elaboración dun artigo de
investigación conxunto co profesor Politis que sexa publicado nunha
revista de prestixio internacional.
Ademais, o labor de investigación levado a cabo durante a súa
permanencia en San Diego vai ser presentado no International
Work-Conference on Time Series Analysis (ITISE 2017) que se
celebrará en Granada do 18 ao 20 de setembro e no XIII Congreso
Galego de Estatística e Investigación de Operacións que terá
lugar en Ferrol do 26 ao 28 de outubro.
As impresións de Inés sobre a vida universitaria de San Diego son
boas: “Tanto o ambiente, como a xente ou o campus de alí son moi
acolledores, o que fixo que os meses que pasei na universidade foran
moi agradables. Eu vivía nunha residencia no norte de San Diego,
fóra do campus. Era un sitio moi tranquilo e con moita vida
estudantil. Resultou ser unha experiencia non só enriquecedora a
nivel académico, senón tamén a nivel persoal, ao atoparte nun país
estranxeiro con diferentes costumes no día a día, e unha cultura
diferente”.
- O investigador Alejandro López
Alejandro López Núñez: Universidade Northwestern,
Chicago.
Por último, Alejandro López Núñez realizou a súa estadía na
Universidade Northwestern de Chicago. O seu eido de estudo foi o das
matemáticas aplicadas á bioloxía, máis polo miúdo o estudo
matemático de modelos que reflictan o medre e desenvolvemento de
biopelículas e a resolución numérica dos devanditos modelos. O
profesor encargado de dirixir a súa investigación foi David Chopp,
experto en métodos numéricos, en particular métodos level set,
que son parte importante no desenvolvemento da tese que está a
realizar. Estes traballos ten a súa aplicación máis inmediata na
súa utilidade para modelar fronteiras móbiles. É por isto que
tamén son moi utilizados para o estudo de glaciares ou para o
tratamento de imaxes.
Nas vindeiras semanas máis investigadores do CITIC incorporaranse a
outras universidades sobranceiras e referenciais para vivir
experiencias semellantes. Desta volta, serán universidades do Reino
Unido (University College of London), Francia (Laboratoire Lagrange
de Niza), México (Universidad de Guadalajara), Japón, Estados
Unidos e España.