Investigadores de toda Europa xúntanse na UVigo para mostrar a confluencia entre acústica e TIC
martes, 19 de xuño do 2018
A
Escola
de Enxeñaría de Telecomunicación da UVigo acolle estes días unha
nova xuntanza investigadora de primeira liña, de cariz
internacional e con vontade de abrir novos e enriquecedores vieiros
de colaboración. Trátase das primeiras Xornadas
en Acústica Avanzada, AcInTic, un encontro no que participan
profesionais de todos os recantos de Europa (Alemaña, Holanda,
Dinamarca, Noruega, Francia...) e que se dirixe a divulgar nas
empresas, sobre todos nas locais, as múltiples posibilidades que
permiten a aplicación dos recursos que abrollan da confluencia entre
o son, por unha banda, e as novas tecnoloxías, pola outra. Sobre
todo en sectores como o motor, a aeronáutica ou a enerxía.
Na
apertura das xornadas participaron o profesor Manuel Sobreira,
principal impulsor deste evento, o vicerreitor de Economía, José
María Martín; o concelleiro de Facenda de Vigo, Jaime Aneiros e o
director da escola, Íñigo Cuiñas, que coincidiron ao salientar “a
importancia deste tipo de encontros profesionais dirixidos a
transferir coñecemento ao tecido empresarial”.
Segundo
fixo saber Cuiñas, “durante anos parecía que o ámbito TIC eran
un e o industrial outro, e había como un muro no medio que nos
separaba, pero pouco a pouco, e cada vez máis, ambos sectores vanse
xuntando, o que fai a sociedade progrese a unha maior velocidade”.
Ao seu xuízo, hai mancheas de exemplos do devandito, unha nova
realidade que se impón na Industria 4.0, na ciberseguridade e, “por
suposto”, na enxeñaría acústica. “Con estas xornadas dáselles
visibilidade a unhas novas tecnoloxías que, ás veces, o mundo
industrial non coñece e que, pola contra, poden serlle de proveito
para resolver unha gran cantidade de problemas”, recalcou Cuiñas.
Durante
toda a mañá houbo diferentes relatorios dedicados a cuestións de
carácter técnico como a visualización de campos acústicos e a
localización de fontes. Participaron expertos como Cástor
Rodríguez, de Sound of Numbers, spin-off da Universidade de
Vigo e entidade colaboradora das xornadas, quen afondou no eido do
beamforming, tecnoloxías acústicas enfocadas sobre todo ao
diagnóstico de fontes acústicas complexas, o que permite cousas
como localizar vibracións producidas por defectos en maquinaria
complexa e localizar onde se xera unha vibración ou a emisión dun
ruído indesexábel.
Tamén
interviñeron David Pérez Cabo e Daniel Fernández, procedentes de
Microflown (Holanda), mostrando o potencial das aplicacións dos
sensores vectoriais acústicos, tanto para a localización de fontes
(por exemplo cazadores furtivos) como para a visualización e mapeado
de campos acústicos xerados por fontes acústicas complexas
(holografía acústica).
Houbo
igualmente relatorios adicados á calidade acústica no ámbito do
motor: un dirixido a realizar unha revisión de estándares e métodos
de avaliación (Santiago Rayes, da empresa danesa Grass) e outra de
Damián González sobre a experiencia do CTAG no test vibroacústico
que eles realizan.
Este
mércores as xornadas centraranse en cuestións relacionadas con
intelixencia artificial no mundo da acústica, tecnoloxías que
permiten desenvolver unha gran cantidade de aplicacións. “Debemos
pensar que en moitas situacións, é a xeración dun evento acústico
o que xera unha situación de alerta: a ruptura dunha condución de
gas, unha caída, unha explosión ou, simplemente, o pranto dun
bebé”, explican os organizadores.
Amais
das diferentes conferencias, que terán lugar ao longo de toda a
mañá, as xornadas dedicarán a quenda da tarde a sesións
demostrativas das diversas tecnoloxías por parte dos principais
patrocinadores das xornadas: Microflown, Müller BBM, Norsonic,
Avantec e Gfai.