Investigadores galegos presentan os detalles un proxecto para producir silicio de forma eficiente e sustentábel
martes, 21 de xuño do 2022
Investigadores
procedentes de nove países de Europa, Estados Unidos e África
reúnense estes días na facultade de Matemáticas da Universidade de
Santiago para pór en común os avances no proxecto europeo SisAl
Pilot. Buscan a produción de silicio de calidade (un dos
compoñentes básicos dos dispositivos electrónicos) con baixo
impacto ambiental. No proxecto participan investigadores adscritos ao
Centro de Investigación e Tecnoloxía Matemática de Galicia
(CITMAGA), impulsado polas
nosas tres universidades (UVigo, USC e UDC). Ademais, forman parte de
SisAl Pilot centros de investigación europeos e empresas nacionais e
internacionais para a aplicación dos resultados, como Fundiciones
Rey (Vilagarcía) e Rey Bronze Castings (Cuntis).
A
apertura do encontro celebrouse na mañá deste martes 21, coa
participación da decana da facultade de Matemáticas da Universidade
de Santiago, Elena Vázquez Cendón; a coordinadora do proxecto e
profesora da Universidade Norueguesa de Ciencia e Tecnoloxía
Gabriella Tranell; e a directora científica en funcións do CITMAga,
Rosa María Crujeiras.
O
silicio
Segundo
se fixo saber, o silicio é unha materia prima fundamental, con
moitas empresas dedicadas á súa produción. Utilízase en
particular na industria electrónica para a elaboración de
semicondutores e microchips para os computadores, pero tamén noutros
ámbitos como os paneis solares, nas aliaxes do aluminio e nas
siliconas. Neste proxecto patentouse un proceso sustentábel e
económico para a produción de silicio, considerado na actualidade
como “un material moi relevante para Europa”.
Os
matemáticos galegos participan neste proxecto internacional
realizando a simulación numérica deste novo proceso industrial nos
fornos da empresa norueguesa Elkem, un dos principais produtores de
silicio de Europa, e de Fundiciones Rey e Rey Bronze Castings en
Galicia. A actual coordinadora deste proxecto no CITMAGA é Dolores
Gómez, profesora do Departamento de Matemática Aplicada da
Universidade de Santiago, no que participan tamén os profesores
Pilar Salgado e José Luís Ferrín e os investigadores Branca García
e Óscar Crego. Explica que “as empresas que participan no proxecto
dispoñen de fornos de diversos tipos (de indución, rotativos, de
arco). Dependendo do forno, as simulacións requiren estudar
diferentes procesos físicos que teñen que ver con modelos de
transferencia de calor con cambio de fase, dinámica de fluídos
multifase, electromagnetismo e reaccións químicas, moitos deles
fortemente axustados. O noso obxectivo é realizar simulacións
numéricas baseadas nestes modelos que poidan apoiar os ensaios
experimentais dos socios industriais. Por pór un exemplo, é posíbel
calcular a temperatura dos materiais que se introducen dentro do
forno e o tempo que tardarían en fundirse a partir dunhas
determinadas condicións de operación”.
A
investigadora Dolores Gómez sinala que a idea é que as industrias
que participan neste proxecto poidan utilizar os seus propios fornos
para a obtención de silicio, sendo posíbel mesmo mellorar o seu
deseño se fose necesario. Explica que “con independencia da
tecnoloxía de forno utilizada, e coa finalidade de deseñar un
proceso eficiente, hai que tomar numerosas decisións técnicas que
están relacionadas principalmente co deseño e a calibración do
forno. Neste sentido, a simulación numérica desempeña un papel
esencial, xa que permite non só comprender mellor os fenómenos
físicos subxacentes e como se axustan, senón tamén investigar o
impacto dun parámetro ou conxunto de parámetros no resultado de
interese ou proporcionar información que doutro xeito habería que
obter a partir de custosos ensaios en planta, que, por outra banda,
non sempre se poden levar a cabo pola dificultade que entrañan.
Tamén é posíbel mellorar o deseño dos fornos a partir do estudo
de distintas configuracións xeométricas”.
Na
xornada deste martes informouse de que hai empresas que
tradicionalmente se dedican á produción de silicio, como a
norueguesa Elkem e en Galicia a fábrica de FerroGlobe na Coruña.
“Se se demostra que con este proceso pódese obter silicio de boa
calidade a baixo custo, este tipo de industrias poderíano utilizar
tamén noutros procesos da propia empresa”, fíxose saber,
engadindo que no caso das galegas Fundiciones Rey e Rey Bronze
Castings, tería máis repercusión posto que na actualidade
dedícanse á fundición de ferro e bronce respectivamente, co cal no
futuro poderían ampliar a súa actividade á obtención de
aluminio-silicio.
A
finalidade é que os fornos que funden o metal resulten moito máis
eficientes, aforrando enerxía, tempo e recursos económicos. E,
segundo Dolores Gómez, os ensaios realizados tanto na empresa
norueguesa como na galega son “moi prometedores” e poñen de
manifesto unha vez máis a importancia da transferencia de
coñecemento da universidade á industria.
Nesta
mesma liña, o equipo do CITMAGA traballa para simular os fornos a
pequena escala de que dispón a Universidade Norueguesa de Ciencia e
Tecnoloxía, coordinadora do proxecto SisAl Pilot e responsable de
patentar este proceso. Neses fornos de pequeno tamaño realízanse as
probas piloto previas, que serven para validar e axustar os modelos
numéricos desenvolvidos polos investigadores, antes de levalos a
cabo a escala industrial.
Na
xornada deste mércores os participantes neste encontro visitarán as
instalacións de Fundiciones Rey en Vilagarcía de Arousa e de Rey
Bronze Castings en Cuntis, co obxecto de ver en funcionamento este
proxecto piloto.