IurisTICGal 2022 afondou nas oportunidades do metaverso no ámbito xudicial

Este 20 de outubro, baixo o lema Antoloxía 2010-2022, celebrouse na Cidade da Cultura un dos grandes acontecementos tecnolóxicos da tempada: a edición número once da Xornada de Informática Xudicial e Delitos Informáticos, IurisTICGal 2022, do Colexio Profesional de Enxeñaría Técnica Informática de Galicia (CPETIG). Foi novamente unha oportunidade inmellorábel para facer avanzar o noso coñecemento en ciberseguridade e en todos aqueles espazos onde conflúen xustiza, investigación de delitos e novas tecnoloxías da información. Nun plano máis específico, este ano tocou poñer o foco no metaverso, cun programa de actividades profundou nas posibilidades que ofrece este novo mundo virtual para o sistema xudicial.
No acto de apertura interviñeron o director xeral de Xustiza, José Tronchoni, o director da Axencia para a Modernización de Galicia, Julián Cerviño e o presidente do CPETIG, Marcos Mata. No encontro foron abordadas temáticas como a dixitalización da Administración de Xustiza en Galicia, o presente e futuro do sistema xudicial e a defensa dos dereitos fundamentais nun mundo dixital.
O maxistrado da Audiencia Nacional, Joaquín Delgado Martín, primeiro relator do evento, remarcou na súa intervención que “o cidadán ten que ser o centro da Xustiza. No caso contrario, pode haber consecuencias negativas”. Pola súa banda, a directora de Administración Dixital da AMTEGA, María José García, apostou por "avanzar na calidade do dato e reducir a presencialidade con todas as garantías". Ofelia Tejerina, avogada experta en TIC e presidenta da Asociación de Internautas falou de “pseudonimato, liberdades, dereitos e metaverso, e como se ven afectados polos ceros e uns”.
Eloy Velasco, maxistrado da Audiencia Nacional e un dos expertos que ano tras ano deixan a súa pegada na xornada do CPETIG, arrancou a súa presentación sobre a proba electrónica e Intelixencia Artificial deixando dous interesantes titulares: “O Dereito imponse porque a Intelixencia Artificial equivócase” e “o Dereito é o único límite de calquera invención humana”.
Yago Reboyras, xefe do Grupo de Ciberdelincuencia da Policía Nacional na Coruña, alertou de que en 2020 a cifra nesta área foi de 5,5 billóns de euros “porque é máis rendible e ten menos riscos”. Advertiu tamén que “hoxe non é precisa demasiada formación delitiva para levala a cabo”.
A cita rematou cunha mesa redonda na que participan os relatores con preguntas do público.
Correspondeu ao presidente do CPETIG, Marcos Mata, agradecer a participación dos relatores e a implicación dos participantes e á AMTEGA por colaborar no desenvolvemento desta actividade.