IurisTICGal afondará esta semana nas oportunidades do metaverso para o sistema xudicial

Esta semana, o xoves 20 de outubro, vai se celebrar en Santiago, na Cidade da Cultura, un dos grandes acontecementos tecnolóxicos da tempada: a edición número once da Xornada de Informática Xudicial e Delitos Informáticos, IurisTICGal 2022, do Colexio Profesional de Enxeñaría Técnica Informática de Galicia (CPETIG). Será novamente unha oportunidade inmellorábel para facer avanzar o noso coñecemento en ciberseguridade e en todos aqueles espazos onde conflúen xustiza, investigación de delitos e novas tecnoloxías da información. Nun plano máis específico, este ano toca poñer o foco no metaverso, cun programa de actividades que busca afondar nas posibilidades que ofrece este novo mundo virtual para o sistema xudicial.
No acto de apertura intervirá o director xeral de Xustiza da Xunta, José Tronchoni, o director da Axencia para a Modernización de Galicia, Julián Cerviño e o presidente do CPETIG, Marcos Mata.
No encontro tamén serán abordadas temáticas como a dixitalización da Administración de Xustiza en Galicia, o estado actual e futuro do sistema xudicial e máis a defensa dos dereitos fundamentais nun mundo dixital.
A undécima edición do evento volve celebrarase de forma presencial a través de cinco relatorios maxistrais e unha mesa redonda final que, baixo o fío temático de O Dereito e a Tecnoloxía, enténdense como deberían?, contará con relatores de destacada traxectoria. Son os que citamos a continuación:
• Joaquín Delgado Martín. Maxistrado da Audiencia Nacional (Sala do Penal) e ex director do Servicio de Modernización y Organización Judicial del Consejo General del Poder Judicial (CGPJ).
• María José García. Directora da Área de Administración Dixital da Axencia para a Modernización Tecnolóxica de Galicia (AMTEGA).
• Ofelia Tejerina. Avogada experta en TIC e presidenta da Asociación de Internautas. Doutora en Dereito Constitucional pola UCM, e doutoranda na Universidade Pontificia de Comillas. Autora do libro Seguridad del Estado y Privacidad (editorial Reus, 2014).
• Eloy Velasco. Maxistrado da Audiencia Nacional. Ex director xeral de Xustiza da Generalitat Valenciana. Investigador destacado da aplicación do Dereito ás novas tecnoloxías e autor de libros como Ejecución de Sentencias Penales (editorial Cólex, 1994) e Delitos Tecnológicos: definición, investigación y prueba en el proceso penal” (editorial Sepin, 2016), entre outros.
• Yago Reboyras. Inspector da Policía Nacional e xefe do Grupo de Ciberdelincuencia na Coruña, desde o ano 2005.
Esta actividade, que este ano realiza unha retrospectiva polas edicións anteriores, volve a converter a Galicia nun punto de encontro e de networking, onde coñecer as últimas iniciativas postas en marcha para impulsar a modernización xudicial. De igual xeito, aborda os desafíos que enfronta a Administración de Xustiza, nun mundo onde a dixitalización abre as portas a grandes oportunidades e retos.
O XI IurisTICGal, como en pasadas edicións, está impulsado polo CPETIG, no marco do Convenio de colaboración que mantén coa Axencia para a Modernización Tecnolóxica (AMTEGA), para a realización de actuacións de formación, capacitación e promoción no ámbito das tecnoloxías da información en Galicia.
Quen precise coñecer mais información e descargar o programa completo desta nova edición (Antoloxía 2010-2022), pode facelo a través da web específica do foro.