James Bond volve nun xogo moi cinematográfico

venres, 16 de xullo do 2010 Marcus Fernández

As películas de James Bond viviron nos últimos anos unha auténtica revolución coa incorporación de Daniel Craig coma intérprete do axente segredo ao servizo da Súa Maxestade, pero os estudos cinematográficos non están a confiar moito neste cambio de rumbo, polo que teñen conxelados os proxectos de novas películas, polo que temos que acudir ao PC, a Xbox 360 e a PlayStation 3 para continuar as historias do personaxe creado por Ian Flemming, nunha aventura que vén de ser anunciada por Activision e que toma por nome James Bond 007: Blood Stone (existindo tamén unha versión do xogo adaptada á Nintendo DS).
Para dar maior continuidade coas últimas películas, Blood Stone contará con Daniel Craig e Judi Dench poñendo a voz no xogo aos seus personaxes cinematográficos, e incluso contarase coa presenza da cantante británica Joss Stone, que interpretará á rapaza da película e tamén pon voz á banda sonora deste título (co tema I’ll Take it All, no que tamén colaborou Dave Stewart de Eurythmics) que levaranos polos currunchos máis exóticos do planeta empregando os típicos accesorios de alta tecnoloxía que caracterizan a 007.
Esta aventura explosiva controlarase en terceira persoa, ofrecerá tiroteos, combates corpo a corpo e persecucións, así como un modo multi-xogador en liña que permitirá a participación de ata 16 usuarios.
O xogo para PC, Xbox 360 e PlayStation 3 está a ser desenvolvido por Bizarre Creations, mentres que o seu irmán cativo para Nintendo DS recaeu no estudo n-Space.