Javier Pereira (CITIC) presenta en Madrid infraestruturas singulares para a atención a persoas con discapacidade

O CITIC da Universidade da Coruña participou nun encontro o pasado 3 de febreiro no CEAPAT (Centro de Referencia Estatal de Autonomía Persoal e Axudas Técnicas – IMSERSO) celebrado en Madrid, no que deu a coñecer algunhas das súas infraestruturas tecnolóxicas máis avanzadas orientadas á atención a persoas con discapacidade.
Durante a xornada, Javier Pereira, subdirector do CITIC, presentou as capacidades do centro da UDC en ámbitos como a captura de movemento e os desenvolvementos de realidade virtual, tecnoloxías que, segundo explicou, “permiten abordar novas solucións en rehabilitación, accesibilidade e autonomía persoal”.
Estas infraestruturas singulares terán un papel clave no desenvolvemento do proxecto HIPA, financiado pola convocatoria I+P da Fundación Española para a Ciencia e a Tecnoloxía (FECYT).
O proxecto HIPA está coordinado pola Universidade de Valladolid e conta coa participación, ademais do CITIC, do servizo de rehabilitación do CHUAC a través do INIBIC, da Consellería de Política Social e Igualdade mediante a Subdirección Xeral de Envellecemento Activo e Innovación Sociosanitaria, do Hospital Río Hortega de Valladolid e da Xefatura de Política Social de Castela e León. A iniciativa busca avanzar en novas solucións tecnolóxicas aplicadas á mellora da calidade de vida das persoas con discapacidade, combinando investigación, innovación e transferencia ao entorno sociosanitario.
No marco deste encontro, o CITIC presentou tamén o proxecto Erasmus+ EDIGIT (European Digital Inclusive Guide for Innovative Teaching), a versión europea do programa Talentos Inclusivos. Esta iniciativa internacional ten como obxectivo “promover a participación das persoas con discapacidade na transición dixital, fomentando enfoques inclusivos na ensinanza de disciplinas STEM (Ciencia, Tecnoloxía, Enxeñaría e Matemáticas) mediante metodoloxías dixitais innovadoras”.
A participación do CITIC neste tipo de foros reforza o seu compromiso co desenvolvemento de tecnoloxías inclusivas e coa colaboración entre institucións académicas, sanitarias e sociais para xerar un impacto real na sociedade.
Tanto o proxecto HIPA como EDIGIT alíñanse coa estratexia do centro coruñés de impulsar unha investigación aplicada que sitúe as persoas no centro da innovación tecnolóxica.