José Manuel Leceta, ex director de Red.es, falará no CiTIUS de como universalizar a innovación
venres, 8 de xaneiro do 2021
O
vindeiro
21 de xaneiro, a partir das 12.30 horas, o salón de actos do CiTIUS
acollerá a presentación do libro Innovación fractal,
publicado recentemente polo autor José Manuel Leceta, que dará a
coñecer os detalles das investigacións sobre fractais (obxectos
matemáticos presentes na natureza que nos axudan a describir con
sinxeleza a complexidade das cousas que nos rodean) que deron como
resultado o dito volume. A
presentación farase chegar en streaming dende o CiTIUS.
A
tese do libro en cuestión ten relación directa coas posibilidades
que nos abren os fractais para desvelar o complexo. Segundo fai
saber, “a innovación de éxito ha de ser simple, aínda que non
sempre sexa sinxela”. Ao tempo, ábrese unha porta a unha clara
identificación do proceso creativo a nivel tecnolóxico cos patróns
que ofrece o medio natural: “E se, como sucede cos fractais,
existisen estruturas subxacentes que se reproducen a diferentes
niveis?” Para demostrar este punto, o autor defende que “innovar
é apostar pola xente; que o emprendemento é un deporte de contacto
e que, como a vida, o emprendemento innovador é unha viaxe”.
A
obra, explican dende o CiTIUS, é “unha reflexión orixinal sobre
un fenómeno complexo, desde o convencemento de que quen entenda as
dinámicas de cambio que inducen a innovación e o emprendemento
estará en mellores condicións de comprender un pouco mellor o
mundo”.
Enxeñeiro
de Telecomunicacións, con diplomas en Dirección Estratéxica,
Economía de Redes, Estudos Internacionais e Xestión da Innovación,
José Manuel Leceta comezou a súa carreira na industria espacial en
1987 primeiro en España e logo en Finlandia, Francia e Xapón,
uníndose ao CDTI en 1992 como membro da delegación española ante a
Axencia Espacial Europea (ESA).
En
1996 foi nomeado xefe do Departamento de Tecnoloxías e Aplicacións
no CDTI; entre 2000 a 2002 foi presidente do Consello Director do
Programa de Lanzadores Ariane e Vicepresidente do Consello de
Programas de Telecomunicacións por Satélite da ESA. Entre 2004 e
2010 foi director internacional do CDTI e membro activo de
CREST-ERAC, representante de alto nivel Eureka e TAFTIE.
Logo
de ser nomeado director do Instituto Europeo de Innovación e
Tecnoloxía (EIT) en 2011, foi tamén profesor visitante no Centro
Robert Schuman de Estudos Avanzados do Instituto Universitario
Europeo (EUI) de Florencia. Amais, foi director xeral de Red.es de
novembro de 2016 a xullo de 2018.