Julio Sánchez Agrelo renova como decano do Colexio Oficial de Enxeñeiros de Telecomunicación

Logo do remate das eleccións á xunta de goberno do Colexio Oficial de Enxeñeiros de Telecomunicación de Galicia (COETG) procedeuse á proclamación e investidura da única candidatura presentada, encabezada por Julio Sánchez Agrelo, que será decano da entidade profesional por catro anos máis.
O decano agradeceu a continuidade do compromiso adquirido polas persoas que renovan nos seus cargos na nova xunta de goberno do COETG, así como o dos novos integrantes, para traballar “nesta etapa que agora comeza, e como en anteriores, sempre en prol dos intereses do colectivo de enxeñeiros de telecomunicación e da sociedade galega”, explicou.
Nos vindeiros días, os integrantes do novo equipo responsábel do COETG tomarán posesión dos seus cargos nunha xuntanza que se vai desenvolver conforme ao establecido no regulamento particular de funcionamento da entidade, a partir da cal renovarán o seu compromiso de traballar na visibilización do colectivo ante a Administración, o sector TIC e a sociedade en xeral.
Entre os obxectivos da nova andaina do COETG figuran os seguintes: “Concienciar da importancia das Tecnoloxías da Información e da Comunicación no progreso socioeconómico da comunidade e incrementar a implicación do colectivo de enxeñeiros de Telecomunicación en áreas emerxentes da industria e sectores estratéxicos”.
O decano, Julio Sánchez Agrelo, é enxeñeiro de Telecomunicación pola Universidade Politécnica de Madrid e ao longo da súa traxectoria profesional ocupou diferentes postos de responsabilidade en empresas de relevancia no sector tecnolóxico, como a operadora de telecomunicacións, R. Actualmente é director executivo (CEO) e Fundador da Escola de Negocios Dixitais HUB.
A composición da xunta de goberno está formada por 18 membros de diferentes perfís profesionais que abranguen a profesión da Enxeñería de Telecomunicación desde múltiples perspectivas como a docencia e investigación universitaria, a administración pública, o sector empresarial, o libre exercicio da profesión e incluso a literaria.