Kinect avanza fóra do ámbito dos videoxogos

Ubi Interactive está a crear encerados interactivos en Puebla (México) empregando o sensor de Kinect

Mentres Kinect perde peso no mundo dos videoxogos (por deixar de ser un accesorio incluído de serie na Xbox One) vai gañando forza como ferramenta para a innovación tecnolóxica, por achegar aos desenvolvedores un sensor tridimensional de movemento a un prezo asumible, de aí que dende Microsoft decidisen publicar un SDK para facilitar o seu aproveitamento e incluso lanzasen unha versión do sensor destinada ao PC. Agora, avanzando nesa mesma liña, presentan tanto o Kinect SDK 2.0 como un adaptador para poder converter o sensor da Xbox One nun accesorio para o PC (que está á venda por 49,99 euros).

Care Innovations aproveita a tecnoloxía de Kinect para labores de fisioterapia

O Kinect SDK 2.0 permite desenvolver aplicacións para Kinect totalmente de balde, sen cobrar licenzas para o uso desta tecnoloxía, e integrando numerosas ferramentas para axilizar o desenvolvemento de solucións que recoñezan xestos e figuras tridimensionais, o que xa de por si é algo moi interesante, pero que agora aínda resulta máis atractivo para os desenvolvedores xa que a Windows Store vén de estrear unha categoría para as aplicacións que fan uso de Kinect, comezando por Kinect Evolution, YAKiT, 3D Bulider e Fusion4D, de xeito que resulta máis doado dar visibilidade a este tipo de creación e tirar así un proveito económico das mesmas.
Actualmente Kinect xa está a aplicarse en numerosos proxectos innovadores, como os de Care Innovations e Ubi Interactive, que aplican esta tecnoloxía para tarefas de fisioterapia para maiores e como solución de encerado interactivo convertendo en táctil calquera superficie (e que está a probarse nun colexio mexicano).