Kitkat xa está presente na terceira parte dos dispositivos con Android

Un dos grandes problemas que moitos acusan do sistema operativo móbil Android é a súa fragmentación, que non chega só da diversidade de terminais, senón da complexidade do seu sistema de actualizacións, que fai que existan moitos dispositivos activos con versións do sistema moi vellas, o que é un lastre para a incorporación de melloras nas aplicacións se queren chegar á meirande parte do público, o que parece que vai camiño de solucionar.
Temos así que os datos recollidos durante os últimos 7 días presentan que o vello Android 2.2 está presente só no 0,5% dos terminais, mentres que as versións 2.3.3-2.3.7 están só no 9,1%, polo que xa poderiamos considerar que Android 2.x sería residual. Pero estas novas aínda non son todo o positivas que deberan, xa que Android 4.4 KitKat, que leva máis dun ano no mercado, só chegou ao 33,9% dos trebello, superando por moito a calquera outra versión de Android, pero constatando que moitos fabricantes deixaron os seus dispositivos ancorados en Android 4.1 (21,3%) e Android 4.2 (20,4), mentres que Android 4.3 parece unha versión que quedou no medio dun salto evolutivo (quedando só no 7% dos dispositivos analizados).
Queda agora agardar a que Android 5.0 Lollipop pegue o seu primeiro estirón no me de xaneiro, para comezar a saír nas estatísticas e conseguir imporse tanto nos smartphones de referencia actuais como nos dispositivos novos.
Outro detalle que podemos salientar é que as pantallas de pequeno tamaño e baixa resolución (que habitualmente ofrecen os operadores de telefonía de balde) parecen estar en clara decadencia, quedando cunha cota de só o 5,4%, e a alta densidade xa se impón en preto de 3 de cada 4 dispositivos, deixando claro que o público é esixente a este respecto.