O #LAIC seguirá convertendo A Coruña en cidade modélica en innovación audiovisual para compartir
luns, 18 de novembro do 2019
A
recta final de ano vai estar na Coruña marcada polas TIC,
prolongándose o proceso continuo de transformación da cidade nun
referente en desenvolvemento, divulgación, formación e intercambio
de experiencias fílmicas tecnolóxico-informáticas. Todo isto vén
a conto para falarmos da reactivación en
decembro do #LAIC, o Laboratorio Audiovisual de Innovación e
Creación, o ciclo de encontros formativos de Coruña Dixital para
persoas interesadas na cultura audiovisual, os novos medios e a
transformación dixital. Na convocatoria que está a piques de
comezar volverán participar cineastas, produtoras, estudantes,
docentes, profesionais da comunicación e do deseño, activistas,
artistas, tecnólogas e especialistas en ferramentas dixitais.
O
obxectivo último é converter A Coruña “nun polo estratéxico de
innovación, creatividade e boas prácticas que xeren modelos de
traballo audiovisual sustentábel”, en palabras do Coruña Dixital.
A
nova edición xirará arredor da creación dixital transmedia,
é dicir, de historias que se expanden en múltiples dispositivos e
formatos, cunha participación activa dos públicos.
O
novo LAIC desenvolverase oficialmente entre xaneiro e marzo de 2020,
cunha primeira sesión panorámica en decembro deste ano da que
recibiremos máis datos en datas vindeiras.
O
comisario do programa, o xestor cultural Sergio Lago, detallou
recentemente que o #LAIC deste ano “estará moito máis vinculado á
creación dixital transmedia e traballará coa comunidade
técnica da cidade adicada á creación audiovisual, á programación
informática e aos novos escenarios de realidade virtual, xa que
temos grandes referencias na cidade neste ámbito”.
A
mediados de decembro o #LAIC desenvolverá unha primeira sesión
panorámica sobre esta temática, para retomar, dende a volta do
Nadal e ata finais de marzo, a súa actividade con sesións semanais
no Centro Ágora.
Dende
as redes de Coruña Dixital anunciaranse de maneira gradual cada unha
das citas e abrirase a inscrición nas charlas e talleres do #LAIC
que, como todas as actividades do programa, serán de balde.
Na
páxina web do laboratorio
temos todo tipo de datos informativos sobre os obxectivos e natureza
do programa, ao que se engade
un vídeo recentemente pendurado no que se informa dos logros de
2019.