LG presenta un novo smartphone con batería de 4.500 mAh

Como anticipo da nova edición do Mobile World Congress de Barcelona LG anuncia un novo smartphone que para moitos sería máis atractivo que o teléfono insignia da marca, xa que o LG X power2 sería un terminal deseñado para contar cunha pantalla de grande tamaño e unha batería de grande capacidade, para garantir unha autonomía extraordinaria.
Dende LG aseguran que a batería de 4.500 mAh do LG X power2 podería permitir que o móbil funcionase durante unha fin de semana completa cunha única carga, sendo capaz de reproducir vídeo até 15 horas seguidas ou navegar pola web unhas 18 horas, o que non afectaría negativamente ao tempo de carga, xa que a tecnoloxía de carga rápida deste terminal permitiría unha carga completa nun par de horas, aínda que nunha hora xa se conseguiría capacidade dabondo para funcionar todo o día.
Este novo smartphone conta cunha pantalla de alta definición de 5,5 polgadas mellorada para unha boa lectura en exteriores, a súa cámara traseira de 13 Mpíxeles presume de grande velocidade, a súa cámara frontal de 5 Mpíxeles aposta por un grande angular para que non sexa preciso empregar un pau de selfie para fotografías de grupo e incluso conta con software de cámara con disparo automático cando detecte unha cara ou mediante xestos, evitando a vibración propia de pulsar o botón de disparo que tende a mover as instantáneas.
En calquera caso, estamos ante un terminal de gama medio que pretende ser bastante asumible para o peto, como deixan ver claramente as súas especificacións, pois este teléfono funciona con 1.5/2 GB de RAM, 16 GB de almacenamento interno (ampliable mediante tarxetas microSD de até 2 TB), LTE, Wi-Fi N, USB 2.0, Bluetooth 4.2 e sistema operativo Android 7.0, que ten un grosor de 8,4 milímetros, un peso de 164 gramos carcasas con acabados en catro cores diferentes (negro, titán, ouro e azul).