LG presenta unha liña de monitores gaming con resolución 5K

LG Electronics anunciou o lanzamento global da súa nova marca premium de monitores gaming, UltraGear evo, que debutará oficialmente no CES 2026. A compañía surcoreana amplía así a súa aposta polas pantallas de moi alta resolución cunha gama que abrangue formatos OLED, New MiniLED e ultrapanorámicos, todos eles con resolucións 5K ou superiores e orientados a combinar definición, velocidade e inmersión sen concesións.
A nova familia UltraGear evo susténtase nunha innovación clave: a primeira tecnoloxía de escalado a 5K mediante intelixencia artificial integrada no propio monitor. Esta solución propietaria permite mellorar contidos de menor resolución ata niveis equivalentes ao 5K sen necesidade de actualizar a tarxeta gráfica do PC, ampliando o abano de xogos e contidos que poden gozarse con alta calidade visual. O sistema complétase con funcións de optimización de escena e son baseadas en IA, que axustan en tempo real a imaxe e o audio.
A estrea da gama inclúe tres modelos insignia: 39GX950B, 27GM950B e 52G930B, todos eles concibidos arredor dun mesmo principio de excelencia en alta resolución.
O UltraGear evo GX9 de 39 polgadas (39GX950B) é un monitor OLED 5K2K que aposta pola tecnoloxía Primary RGB Tandem OLED para mellorar brillo, fidelidade cromática e durabilidade do panel. Incorpora un modo dual que permite alternar entre 165 Hz en resolución 5K2K e 330 Hz en WFHD, cun tempo de resposta de 0,03 ms. A pantalla ultrapanorámica 21:9 cunha curvatura de 1500R mantén a altura vertical dun panel de 32 polgadas e ofrece unha densidade de 142 píxeles por polgada, ademais da certificación VESA DisplayHDR True Black 500.
No segmento MiniLED, o UltraGear evo GM9 de 27 polgadas (27GM950B) preséntase como o primeiro monitor gaming 5K do mundo con tecnoloxía New MiniLED deseñada para reducir de forma significativa o efecto blooming. Dispón de 2.304 zonas de atenuación local e unha arquitectura de distancia óptica cero, o que permite un control máis preciso da luz e do contraste. O panel admite tamén modo dual, con 165 Hz en 5K e 330 Hz en QHD, e alcanza ata 1.250 nits de brillo máximo, con certificación VESA DisplayHDR 1000.
A proposta máis ambiciosa da gama é o UltraGear evo G9 de 52 polgadas (52G930B), definido por LG como o maior monitor gaming 5K2K do mercado. Cunha frecuencia de refresco de 240 Hz e unha curvatura de 1000R, ofrece unha superficie de traballo un 33 % máis ampla ca a dun monitor UHD estándar. A súa relación panorámica 12:9 mantén a altura visual dun panel 16:9 de 42 polgadas e conta con certificación VESA DisplayHDR 600.