LG presenta unha pantalla integrada nun maletín

LG anunciou hoxe o lanzamento mundial da súa pantalla LG StanbyME Go (modelo 27LX5), que consiste nunha pantalla táctil de 27 polgadas cun sistema de altofalantes de 4 canles que suman 20 watts que chega integrada nun maletín, de xeito que facilita o seu uso en mobilidade.
Esta pantalla chega cunha batería con autonomía de até 3 horas, e permitiría gozar de películas, xogos e outras funcións propias dun Smart TV tanto en interiores como en exteriores. O propio maletín tamén resulta práctico para transportar cables e o mando a distancia.
Esta pantalla pode empregarse en modo mesa (por exemplo, para gozar de xogos de mesa) e tamén con distintos ángulos de inclinación e rotación, para que así poida aproveitarse nunha grande variedade de espazos e condicións, converténdose nun produto moi interesante cando se estea de viaxe ou excursión.
Como calquera outra pantalla con webOS, a LG StanbyME GO pode conectarse de xeito doado a dispositivos móbiles para recibir contidos dos mesmos. Esta previsto que o produto comece a venderse en España no mes de setembro.