LG quere amosar as súas novas pantallas OLED transparentes no CES

luns, 27 de decembro do 2021 Marcus Fernández

Aínda que a celebración do CES de Las Vegas semella que vai ser simplemente testemuñal este ano por mor da COVID-19, LG continúa a adiantar produtos que vai amosar presencialmente, entre os que destacan as novas pantallas transparentes de LG Displays, que chegarán en distintos formatos para adaptarse a numerosas necesidades e espazos.
As pantallas OLED Shelf consistirían nun par de pantallas OLED transparentes, montada unha sobre a outra (cun estante na parte superior), pensadas para a súa instalación en salóns, e que poderían amosar contidos televisivos ou obras de arte, en ambas pantallas (simultaneamente ou por separado) e, no caso de que o que busquemos sexa precisamente amosar obras de arte, a transparencia da pantalla facilitaría a súa integración coa parede que houbese detrás. O sistema tamén conta cun panel opaco que pode deslizarse na parte traseira da pantalla transparente, para cando desexen verse contidos con maior calidade.
De cara a establecementos comerciais de luxo teñen un Shopping Managing Showcase, ou sexa, unha especie de expositor cunha base de madeira sobre a que poden colocarse produtos que figurarán detrás dunha pantalla OLED transparente, na que pode presentarse información e gráficos que destaquen detalles sobre os produtos, conseguindo así unha experiencia de compra futurista.
Nun formato máis grande terían a Show Window, unha estrutura que integraría 4 pantallas transparentes OLED de 55 polgadas, que poderían empregarse para presentar texto dixital sobre produtos en escaparates ou no interior das propias tnedas, podendo así amosar grafismos que muden no tempo, chamando así a atención do público.
Tamén están a preparar unha Smart Window, pantalla OLED transparente que estaría pensada para videoconferencias e presentacións na oficina.
En calquera caso, falamos da presentación dunha tecnoloxía, non de produtos comerciais en si mesmo, xa que dependerá en boa medida da demanda que exista no mercado para este tipo de produtos, que previsiblemente non veremos de xeito masivo, pero que probablemente fagan acto de presenza en museos, tendas emblemáticas de grandes marcas e instalacións puntuais nas que busquen crear un grande impacto visual, demostrando o rol que poden xogar as pantallas transparentes para enriquecer con contidos o mundo que nos rodea.

As pantallas OLED Shelf pretenden integrarse nos fogares dun xeito innovador
A Show Window integra 4 pantallas de 55 polgadas

PUBLICIDADE