LINE facilita xogar de balde a Puzzle Bobble en iOS e Android

Os usuarios da aplicación de mensaxería instantánea LINE en dispositivos móbiles con iOS e Android poden xa gozar de balde de todo un clásico do mundo dos videoxogos: Puzzle Bobble. Temos así que tanto na App Store como en Google Play está dispoñible para a súa descarga LINE Puzzle Bobble, o popular xogo no que Bub e Bob, protagonistas no xogo de Taito Bubble Bobble, teñen que lanzar burbullas de cores de xeito que de xuntar tres iguais, esbourarán, tendo como obxectivo eliminar todas de cada pantalla, fórmula que seguiron moitos outros títulos que chegaron ao abeiro de Tetris.
O novo LINE Puzzle Bobble permite percorrer un mundo con máis de 90 fases que superar, recibirá actualizacións de balde periódicas (con novos niveis e características), conta con numerosos elementos desbloqueables, permite competir cos amigos para ver quen consegue a mellor puntuación en torneos semanais e permite enviar corazóns aos amigos para axudalos a poder xogar máis (e que nós recibamos outro en compensación).