Lanza web a marca pontevedresa PO2, o distintivo local polas cidades limpas
martes, 30 de xuño do 2020
- O contraste entre a Pontevedra dos coches e a peonil nunha imaxe de Rafa Fariña
O
Concello de Pontevedra puxo en marcha este mes de xuño unha nova
páxina web municipal para loitar polo medio ambiente e o futuro do
planeta. Trátase do
sitio online da marca pontevedresa Efecto PO2, que
aglutina as accións da iniciativa e que será, un altofalante de
todas as actividades que se vaian sucedendo tanto de difusión e
comunicación, como de proxectos que se impulsen ao amparo da marca.
O
Efecto PO2 vén da man da Concellaría de Promoción da cidade que
xestiona Anabel Gulías. A iniciativa foi posta en marcha en
setembro, coincidindo coa folga e a mobilización mundial en defensa
do clima.
Naquel
momento, o Concello impulsou o proxecto Efecto PO2 como “concepto
que aglutina o modelo de cidade xunto á necesidade de actuar
localmente a prol do clima e na mellora do planeta”. A
web impulsada agora recolle todos os fitos relacionados coa marca e a
vertente green de Pontevedra, como a concesión do
primeiro premio Urban Road Safety Award da Comisión Europea á
cidade.
Tamén
se plasman outros eventos realizados até o de agora baixo a marca
Efecto PO2 como as charlas do CSIC nos institutos ou o traballo dos
alumnos e alumnas de Primaria sobre a contaminación, que se expuxo
en febreiro nas Palmeiras.
Outro
dos elementos que inclúe a nova páxina son as novas relacionadas co
Efecto PO2 ou recursos gráficos como os carteis da última campaña.
No
epígrafe Destacados recóllense os programas que pon en
marcha a marca como o Observatorio PO2.