Lenovo presenta novos produtos en Berlín

A consola portátil baseada en Windows 11 de Lenovo, filtrada hai varias semanas, finalmente ve a luz na feira IFA de Berlín, marco elixido por Lenovo para presentar outros produtos interesantes, como ordenadores portátiles para xogadores e un impresionante monitor que ofrece imaxes en 3D sen precisar de lentes.
A Lenovo Legion Go funcionará cun procesador AMD Ryzen Z1 Extreme, até 16 GB de RAM LPDDR5X, pantalla táctil de 8,8 polgadas e batería de 49,2Wh que pode cargarse até o 70% en media hora. Será así unha boa alternativa á Steam Deck de Valve, para usuarios que busquen maiores prestacións e coa maior flexibilidade que achega unha máquina baseada en Windows. Chegará ás tendas en outubro.
Pero o produto máis curioso dos presentados por Lenovo en Berlín é o monitor ThinkVision 27 3D, que consegue proxectar unha imaxe diferente para cada ollo do usuario, conseguindo así unha visión estereoscópica, o que resulta especialmente atractivo para os profesionais que traballan con modelos 3D, pois poden comprobar o seu volume en tempo real. Cando se emprega en 2D o monitor compórtase como unha pantalla 4K ordinaria. Aínda que se estea a amosar estes días en Berlín, non chegará ao mercado até febreiro de 2024.