Lenovo presenta o que podería ser o primeiro portátil 5G do mundo

luns, 27 de maio do 2019 Marcus Fernández

Lenovo e Qualcomm aproveitaron a celebración do Computex en Taipei para presentar o Project Limitless, o que consideran que é o primeiro ordenador do mercado con 5G, entendendo que estamos ante un equipo portátil que poden gozar de conexión á Rede en todo momento, conseguindo unha grande experiencia de uso en certos escenarios que consideran adaptados tanto a consumidores como a empresas.
Este novo ordenador ultraportátil de Lenovo sería o primeiro en integrar un modem 5G Snapdragon X55 de Qualcomm, capaz de conectarse a redes 5G, o que permite velocidades de conexión moi elevadas, facendo máis doada de cumprir a promesa dos equipos sempre conectados. Grazas ao 5G este equipo en mobilidade poder gozar de velocidades de transferencia de ficheiros máis rápidas, streaming en 4K e 8K, e incluso xogar en mobilidade.
Co procesador Qualcomm 8cx, o novo equipo de Lenovo podería gozar de velocidades multi.gigabit, boa autonomía, aplicacións corporativas e capacidades de seguridade reforzada, de xeito que teriamos tanto para traballo como para o lecer un equipo que tería unha conectividade e versatilidade que pode lembrar á dun smartphone, pero no formato de ordenador portátil.
Pero este equipo que pretende chegar ao mercado a primeiros de 2020 non só terá un desempeño impresionante baixo redes 5G, senón que tamén está preparado para as últimas versións da tecnoloxía 4G, de xeito que podería conseguir descargas a até 2,5 Gbps se o noso provedor móbil de acceso á Rede soportase tal velocidade baixo LTE.

PUBLICIDADE