Liquidan a propiedade intelectual de Tequila Works

O pasado mes de novembro o estudio español Tequila Works declarouse en concurso de acredores, tras problemas económicos provocados polo desinvestimento no sector dos videoxogos de Tencent (grupo chinés que colaboraba co estudio dende 2022), e tras non atopar un novo socio económico, o mes pasado o estudio pechou as súas portas, e agora vemos que a propiedade intelectual do estudio está a ofrecerse en poxa a través de Escrapalia.
Os activos intanxibles de Tequila Works agrupáronse en 9 lotes que inclúen as propiedades intelectuais consolidadas como son os xogos Deadlight, Rhyme, GYLT e The Invisible Hours, os xogos que tiñan en desenvolvemento (Brawler Crawler, Dungeon Tour, The Ancient Mariner e un paquete con 4 proxectos orixinais listos para iniciar a súa produción) e incluso a propia marca Tequila Works.
Está previsto que a poxa remate o 14 de maio, e aínda que estamos ante a liquidación dun proxecto empresarial fracasado, semella bastante probable que algúns dos proxectos do estudio poida chegar a ter unha segunda vida da man dos seus propios creadores a través de novos estudios que poidan coller a remuda aproveitando esta poxa.