Logitech presenta novos ratos que funcionan sobre case calquera superficie

A tecnoloxía BlueTrack de Microsoft, que permite o uso de ratos láser sobre case calquera superficie, xa ten resposta por parte de Logitech, que presenta os ratos Performance Mouse MX e Anywhere Mouse MX, destinados a equipos de sobremesa e portátiles respectivamente, e incluíndo en ambos casos a tecnoloxía Darkfield Laser Tracking, permitindo o uso do rato sobre superficies tradicionalmente imposibles coma o vidro, superficies rugosas ou demasiado claras.
Amais, os novos ratos son compatibles co novo receptor USB unificado de Logitech. O modelo grande conta con batería integrada recargable a través de microUSB e que estará á venda por 99,99 euros, mentres que o modelo portátil funcionará cunha pila AA e véndese por 79,99 euros.