Lugo achegará pílulas de coñecemento para emprendedoras
venres, 22 de marzo do 2019
O
Concello de Lugo, a través das súas edís Rosana Rielo e Ana
Prieto, presentou este mércores un innovador programa de formación
para facilitar o camiño do emprendemento entre a veciñanza. A
iniciativa, que tamén foi dada a coñecer no Edificio de Novas
Tecnoloxías pola Fundación CEL (co-organizadora), ten a súa orixe
nos Orzamentos Participativos, polo que responde ao interese directo
da cidadanía por adestrarse en ferramentas que lle facilite a
transformación das súas ideas de mercado en realidades palpábeis e
de éxito.
O
programa chámase Pílulas de coñecemento para
persoas emprendedoras e materializouse polo impulso da asociación
Mulleres Empresarias. Trátase dunha das 8 propostas de
dinamización e apoio ao emprendemento que pediu a veciñanza no
proceso de acción participativa de goberno desenvolvido na Rede, a
través da páxina web https://loop.lugo.gal/.
Tal
e como explicou Rosana Rielo, trátase de 4 obradoiros de balde, de
15 horas de duración cada un, que se celebrarán de luns a xoves na
sede da CEL, na praza de Santo Domingo, en xornada de tarde, a partir
do 1 de abril. Cada taller ten un número máximo de participantes de
15 (60 prazas en total), e as inscricións débense realizar a través
de www.cel.es. A concelleira, quen
agradeceu de novo “a implicación de todos os veciños e veciñas
nos Orzamentos Participativos”, puxo en valor a celebración destas
pílulas, nas que se desenvolverán as capacidades cognitivas,
emocionais e relacionais que precisan as organizacións hoxe en día,
e nas que se tocarán temáticas como por exemplo as novas tendencias
dixitais da mercadotecnia ou a gamificación, entre outras
moitas.
Pola
súa banda Ana Prieto, enxalzou o “espírito emprendedor que temos
en Lugo”, cousa que se ve reflectida “no éxito que acadan as
propostas dedicadas ao emprendemento nos Orzamentos Participativos,
que son moitas e variadas”.
Para
rematar, Lourdes Pardo, da Fundación CEL, agradeceu ao Concello “a
súa sensibilidade por fomentar o emprendemento” e amosou a súa
satisfacción por poder celebrar esta proposta, “moi interesante as
emprendedoras e emprendedores”, tanto os que xa o son, como os que
se preparan para selo.