Lugo estrea bancos intelixentes con Wi-Fi e sensores
xoves, 28 de xullo do 2022
O
Concello de Lugo, ao abeiro do seu proxecto de Smart City, vén
de habilitar bancos intelixentes con conectividade Wi-Fi e sensores
que achegan aos usuarios información sobre a calidade ambiental.
Ademais, ofrecen aos cidadáns a posibilidade de recargar bicicletas
eléctricas, así como diferentes dispositivos como teléfonos ou
tabletas.
“Este
novo mobiliario urbano estará situado no marco da nova senda verde
ciclista de Lugo”, explicou a rexedora Lara Méndez, quen subliñou que “a súa
instalación comezou o pasado venres e actualmente estanse a
configurar para que proximamente poidan entrar en funcionamento e,
deste xeito, poñelos a disposición de toda a cidadanía”.
Lara
Méndez engadiu que “o seu uso será moi doado e intuitivo e
contarán, ademais, cunhas instruccións accesíbeis a través dun
código QR en varios idiomas”. Os bancos dispoñen así mesmo dun
aparcabicis por cada lateral.
Nestes
momentos, xa se atopan instalados catro bancos, diante do instituto
Leiras Pulpeiro, na rúa Orquídea; fronte ao Mercadona da Fonte dos
Ranchos; na beirarrúa dereita da Rolda do Carme (en sentido Fonte
dos Ranchos); á altura do cruce do Camiño Primitivo (onde se sitúa o paso de peóns intelixente); e na parte alta da rúa Santiago, preto da Rolda da Muralla. Máis adiante, instalarase un quinto no Paseo do Miño, na zona próxima á ponte romana.
Os bancos, dotados con paneis solares, contan con sensores de temperatura, humidade e presión; luz ambiental LED; portos de recarga de dispositivos electrónicos, a través de cable e tamén sen fíos, entre outras especificacións. Ademais, disporán dun compresor de aire, para o inflado de rodas, e un kit básico de ferramentas para o arranxo de bicicletas.
- O Goberno de Lara Méndez instala bancos intelixentes con Wi-Fi e sensores que proporcionan información sobre a calidade ambiental