Máis de 130 persoas fomentan a mobilidade sustentábel en Santiago coa app SmartWay

Un total de 134 persoas xa contan no seu teléfono móbil con SmartWay Smartiago, a aplicación que premia á cidadanía que promove a mobilidade sustentábel en Santiago, ao abeiro do proxecto Xemelgo Dixital (enmarcado á súa vez na iniciativa Smartiago, a iniciativa de Cidade Intelixente impulsada polo Concello de Santiago).
Esta aplicación pode descargarse de xeito gratuíto nos sistemas iOS e Android e o seu funcionamento, segundo informa o Concello, é moi sinxelo: unha vez descargada a aplicación, a persoa usuaria deberá rexistrarse cos seus datos persoais para poder monitorizar a súa propia ruta, podéndoa compartir cun coñecido ou familiar. Ademais, dependendo de factores como o modo de desprazamento elixido (a pé, en bicicleta ou moto), a persoa usuaria obterá puntos que poderá trocar en Smartket, un espazo virtual onde se atopan varias entidades e comercios locais que ofertan os seus servizos ou produtos con descontos.
Polo de agora a lista de colaboradores comprende o Centro Comercial As Cancelas, a tenda ecolóxica de comestíbeis A Cesta da Saúde, o Multiusos Fontes do Sar e a tetería e ecotenda O Xardín dos Soños.
“SmartWay Smartiago é unha aplicación que está en constante revisión para seguir mellorando a súa utilidade”, explicou o Concello, poñendo o foco no seu potencial para facilitar á Administración local posicionar a urbe como pioneira no fomento da mobilidade intelixente e sustentábel, podendo trasladar o seu uso a outras Cidades Patrimonio de España.
Proxecto Xemelgo
Dentro da liña de actuación de mobilidade atópase a iniciativa do Xemelgo Dixital, impulsado pola empresa Itera Técnica, que versa na creación dun modelo plenamente funcional e o máis próximo posíbel á realidade de Santiago de Compostela.
Para levar a cabo este proxecto substituíronse 22 bancos de mobiliario urbano en diferentes puntos da cidade. Cada un deles conta cun sensor que capta o movemento da cidadanía.
Con este prototipo virtual poderanse modelar fluxos de mobilidade peonil e, sobre todo, estimar o impacto sobre os mesmos cos cambios que se produzan na contorna urbana.
O obxectivo final que persegue esta iniciativa de vangarda é acadar unha mellor planificación urbana e xestión de actividades ao poder contrastar as predicións dos resultados deste xemelgo dixital coa evolución dos movementos das persoas reais.