Máis de 250.000 persoas visitaron os Museos Científicos Coruñeses desde inicios de ano

No que vai de ano, 252.056 persoas visitaron as instalacións dos Museos Científicos Coruñeses, un servizo do Concello da Coruña que comprende tres museos de ciencia interactivos: a Casa das Ciencias, a Domus e o Aquarium Finisterrae. En termos comparativos, esa cifra supón un incremento do 24 % con respecto ao número de visitantes rexistrado para o mesmo período no ano pasado, entre inicios de xaneiro e finais de xullo (cando se contabilizaron 203.296 visitantes, segundo datos achegados pola alcaldesa, Inés Rey, que subliñou que "o equipo de profesionais dos Museos Científicos Coruñeses leva a cabo unha labor primordial de divulgación entre o público de todas as idades".
Ademais, a rexedora remontouse no tempo, para lembrar o caso da Casa das Ciencias, "que no 1985 converteuse no primero museo público interactivo de España, e abriu camiño á rede de Museos Científicos Coruñeses, que é un orgullo para a nosa cidade".
Volvendo aos datos deste ano, e xa polo miúdo, no desglose de cifras por cada instalación destaca o aumento de afluencia nas instalacións dos Aquarium Finisterrae, no que se contabilizaron 133.293 visitantes no que vai de ano. Marcos Pérez Maldonado, director dos Museos Científicos Coruñeses, indicou que "neste primeiro semestre de ano, as cifras relativas ao Aquarium foron moi boas, grazas ao éxito da campaña escolar e á boa afluencia do público local. No verán mantemos esa tónica, pero a visita segue sendo cómoda porque a nosa prioridade sempre é que a experiencia do público sexa gratificante".
Ademais, tamén nestes primeiros sete meses de 2023, detectouse un incremento de visitas na Domus, cun balance de 65.946 persoas rexistradas, superando amplamente o dato parcial para o mesmo período do ano pasado: entre xaneiro e xullo de 2022 contabilizáronse 47.077 visitantes.
Por outra banda, no que vai de ano, na Casa das Ciencias rexistráronse 53.267 visitantes, superando tamén o dato parcial para o mesmo período no 2022, cando pasaron polo museo 44.766 persoas.
No referente ás cifras específicas deste mes de xullo de 2023, no Aquarium Finisterrae contabilizáronse 28.890 visitantes (foron 24.787 en xullo de 2022); na Domus rexistráronse 10.071 visitantes (foron 8.743 en xullo de 2022); e pola Casa das Ciencias pasaron 8.200 persoas (en xullo do ano pasado foron 7.218).
O horario de verán dos Museos Científicos Coruñeses esténdese ata o 31 de agosto
A inicios de xullo, os Museos Científicos Coruñeses deron comezo ao seu horario de verán, que se estenderá ata o xoves 31 de agosto. Ata entón, abrirán as súas portas desde as 10.00 ata as 20.00 horas, aínda que o acceso pechará ás 19.00 horas no Aquarium Finisterrae e ás 19.30 horas na Casa das Ciencias e na Domus.
Os tres museos contarán, ademais, cunha programación especial de sesións de planetario, actividades e proxeccións audiovisuais. A información completa está dispoñible a través da web municipal de Museos Científicos.