Máis de 3.500 detidos por delitos contra a propiedade industrial e intelectual ó longo de 2006

A Oficina Española de Patentes e Marcas vén de presentar as conclusións do Informe sobre Intervencións 2006 nas que dá conta do total de delitos contra a propiedade industrial e intelectual levadas a cabo ó longo do pasado ano.
O devandito estudo indica que os Corpos e Forzas de Seguridade do Estado realizaron un total de 3.002 intervencións, detiveron a 3.629 persoas por delitos contra a propiedade e incautaron máis de 7 millóns de unidades falsas e piratas.
Do total de intervencións realizadas, o 36 por cento corresponde a produtos que se encadran dentro da propiedade industrial, mentres que o 64 por cento restante corresponde á propiedade intelectual.
Por outra banda, o valor total das mercadorías incautadas ascende a 158.519.848 euros, cifra da que o 70 por cento corresponde ás intervencións realizadas en propiedade industrial e o 30 por cento restante pertence a mercadorías incautadas en propiedade intelectual.
A Comunidade Valenciana lidera o número de intervencións totais realizadas no país (18 por cento), seguida de Andalucía (16,2 por cento), Murcia (11,4 por cento) e Cataluña (11 por cento). O resto das comunidades autónomas (entre elas Galiza), non van alén do 10 por cento do total.
No relativo ás incautacións por propiedade industrial, o sector máis afectado é, coma noutros anos, o téxtil, cun 46,6 por cento, e no relativo á propiedade intelectual, cómpre salientar o número de operacións realizadas no sector audiovisual, con un 83,5 por cento do total, mentres que o fonográfico acada un 14,5 por cento.
O Informe sobre Intervencións 2006 foi elaborado no marco das Comisións Intersectoriais para actuar contra as actividades vulneradoras de dereitos de Propiedade Intelectual e Industrial cos datos que facilitan as Forzas e Corpos de Seguridade do Estado.