Máis de 300 persoas participaron na visita guiada a AtlantTIC
luns, 12 de novembro do 2018
O
pasado 9 de novembro o centro
de investigación AtlantTIC do Campus de Vigo, centrado en
Tecnoloxías da Información e a Comunicación, celebrou unha
xornada de portas abertas. Ou sexa, que se abriu á cidadanía de a
pé e fixo gala dos seus principais proxectos e desafíos. Na cita
participaron finalmente máis de 300 persoas, co que se superaron
amplamente os prognósticos da organización, que, trala xuntanza,
mostrou a súa intención de facer que este tipo de actividades (este
achegamento de AtlantTIC á sociedade galega) sexa algo regular e co
que poidamos contar cada pouco.
Amais
da visita guiada en si mesma, a experiencia veu acompañada dunha
ducia de obradoiros e experimentos que deron a oportunidade de
coñecer en detalle, aos máis de 300 asistentes que se achegaron ás
instalacións, as novas tecnoloxías como a impresión 3D, os
nanosatélites, o recoñecemento facial, as aplicacións móbiles
deseñadas para facilitar a comunicación a persoas con dificultades
específicas ou as ferramentas de detección de manipulacións en
fotos e vídeos, entre outros achados innovadores.
Carlos
Mosquera, director do centro, mostrou deste xeito a súa satisfacción
coa experiencia: “Estamos sorprendidos pola cantidade de xente que
participou. Superáronse todas as nosas expectativas, sobre todo
tendo en conta as malas condicións climatolóxicas que nos
acompañaron durante toda a tarde. Ás veces os investigadores e
investigadoras estamos moi centrados no noso traballo e non nos damos
conta do que pode interesar todo o que facemos e estas xornadas
demostran que a xente ten gañas de coñecer o que se fai na
Universidade de Vigo”.
O
itinerario guiado incluíu un achegamento ao laboratorio de
seguimento de satélites (que conta cun gran número de antenas e un
moderno equipamento electrónico que permite participar en todas as
etapas que seguen ao lanzamento dunha misión espacial), e ao
laboratorio de acústica, no que as persoas participantes puideron
coñecer a cámara semianecoica e distintos equipamentos.
A
visita integrouse no programa de actividades de divulgación
científica e tecnolóxica Ciencia Singular, creado para amosar á
sociedade o traballo desenvolvido nos tres centros singulares de
investigación da universidade viguesa: AtlantTIC, o Centro de
Investigación Mariña (CIM) e o Centro de Investigacións Biomédicas
(CINBIO).
O
encargado de levar a cabo as actividades foi o persoal dos grupos de
investigación que conforman o devandito centro TIC.