Máis de 8.500 persoas empregaron a aplicación habilitada para poder acceder ao illote Areoso

luns, 11 de setembro do 2023 S. P.

Máis de 8.500 persoas solicitaron autorización para acceder ao illote Areoso, na ría de Arousa, durante os dous primeiros meses de aplicación do novo sistema tecnolóxico de control impulsado pola Xunta para regular e ordenar os desprazamentos a este espazo natural. Este dato foi achegado pola conselleira de Medio Ambiente, Ángeles Vázquez, durante visita ao illote na que fixo balance da aplicación desde a súa posta en marcha, o pasado 4 de xullo. Sinalou que o sistema funcionou con normalidade e sen grandes incidencias, “como demostra o feito de que ata o momento a afluencia media rexistrada estea situada en 123 persoas diarias”.
Acompañada pola directora xeral de Patrimonio Natural, Belén do Campo, a vicepresidenta salientou que neste período 7 de cada 10 visitantes optaron para os seus desprazamentos por embarcacións sen motor, destacando sobre todo o uso de piraguas; outro 20% accedeu ao Areoso en barcos motorizados; e case un 10% optou por fondear nas augas que rodean o illote.
Así mesmo, tamén destacou que “se ben durante as primeiras semanas de xullo o ritmo de autorizacións emitidas foi algo menor, coincidindo coa posta en marcha do novo sistema e da aplicación dixital para tramitar os permisos, no mes de agosto detectouse un incremento das solicitudes e por conseguinte, da afluencia”. De feito, no período comprendido entre o 3 e o 27 de agosto completouse todos os días a cota máxiao de visitantes, fixado en 150 persoas repartidas en 3 quendas horarias, “algo que tamén ocorreu puntualmente algún día illado durante as fins de semana de finais de xullo”, dixo.
Polo que respecta ás preferencias horarias dos usuarios para achegarse ata o Areoso, a vicepresidenta explicou que, con diferencia, a quenda máis solicitada este verán foi a segunda, que permite acceder ao illote entre as 13,00 horas e as 17,00 horas, seguida da terceira e última franxa horaria dispoñíbel, que vai desde as 17,00 horas ata o solpor.
A aplicación
A Consellería de Medio Ambiente e a axencia autonómica AMTEGA activaron o 3 de xullo a aplicación web para controlar o acceso ao illote Areoso, na ría de Arousa, coincidindo coa publicación no Diario Oficial de Galicia da orde reguladora de usos públicos e actividades permitidas no espazo natural que conforman o arquipélago dos Guidoiros, do que forma parte este illote, e máis a illa de Rúa (en Ribeira).
A aplicación está dispoñíbel na ligazón areoso.xunta.gal.
O sistema deseñado pola AMTEGA para canalizar as autorizacións de visita e regular o fluxo de persoas que acceden ao illote do Areoso contou co apoio e supervisión da Vicepresidencia Segunda, que informou que “na práctica será moi similar ao que se utiliza xa desde hai varios anos no Parque Nacional das Illas Atlánticas de Galicia e no Monumento Natural das Catedrais, polo que a súa eficacia e operatividade están demostradas”.
Fontes da Xunta lembraron que o departamento autonómico empezou a traballar o ano pasado no regulamento de usos e actividades permitidas no conxunto que conforman o Areoso e outra serie de illas próximas co fin de “garantir o equilibrio entre a protección dos seus valores e recursos naturais e o aproveitamento público deste espazo, que nos últimos anos viña rexistrando unha afluencia de visitantes crecente”.

PUBLICIDADE