Máis dun milleiro de persoas participan xa no programa de Formación Dixital de AMTEGA

A Xunta de Galicia, a través da Axencia para a Modernización Tecnolóxica de Galicia (AMTEGA), lanzou o programa Formación Dixital, un proxecto que conta coa participación de máis de 1.000 alumnos e alumnas.
Este curso, cen por cen de balde, en liña e titorizado, ten como obxectivo principal “preparar á cidadanía para obter a Certificación Galega de Competencias Dixitais (ComDix) e fomentar a alfabetización dixital no marco da Estratexia Galicia Dixital 2030”.
O programa está deseñado para persoas maiores de 14 anos, coa meta de chegar a máis de 45.000 participantes. A través dunha formación accesible e práctica, Formación Dixital busca dotar aos galegos e galegas de ferramentas que lles permitan desenvolverse con seguridade nunha contorna dixital cada vez máis demandante.
O curso, de nivel intermedio, ten unha duración máxima de 10 semanas. Durante este tempo, os participantes terán acceso a contidos teóricos e actividades prácticas deseñadas para facilitar a aprendizaxe, sempre baixo a guía de titores especializados. A formación está estruturada en cinco áreas:
1. Información e datos: xestión e análise da información dixital.
2. Comunicación e colaboración: interacción e traballo en contornas dixitais.
3. Creación de contido dixital: desenvolvemento de contido adaptado á contorna tecnolóxica.
4. Seguridade e privacidade: boas prácticas para protexer datos persoais e dispositivos.
5. Solución de problemas: habilidades para resolver incidencias no ámbito dixital.
Un proxecto financiado pola Unión Europea
Grazas ao financiamento do Plan de Recuperación, Transformación e Resiliencia mediante os fondos Next Generation da Unión Europea, o curso é completamente gratuíto para o alumnado. Segundo lembra AMTEGA, “isto permite que calquera persoa interesada poida acceder sen restricións económicas a unha formación de calidade que, ademais, serviralle como base para obter a certificación oficial en competencias dixitais de Galicia”.
Inscrición aberta
As persoas interesadas poden inscribirse a través da páxina web oficial do programa. Con iniciativas como esta, a Xunta de Galicia reforza o seu “compromiso co desenvolvemento tecnolóxico da comunidade autónoma, promovendo unha sociedade máis preparada para afrontar os retos do futuro dixital”, segundo informaron fontes de AMTEGA.