A Maker Faire Galicia 2022 virá co programa máis completo das oito edicións
mércores, 18 de maio do 2022
Este
18 de maio presentouse oficialmente no Pazo de Raxoi de Santiago de
Compostela a 8ª edición da Maker
Faire Galicia, o evento de tecnoloxías abertas, participativas e
argalleiras máis grande da península, que tras dous anos en formato
100% en liña debido á pandemia, retoma plenamente o seu formato
presencial. Esta edición serán presentados máis de 60 proxectos e
nela participarán ao redor de 200 makers. A axenda incluirá
máis de 80 charlas e obradoiros, tanto en liña como en formato
presencial, durante as cinco xornadas de feira.
“Esta
edición”, segundo sinalou a organización, “achegará o que pode
ser o mundo 5.0, que ten que ver sobre todo coa sustentabilidade do
planeta e o benestar das persoas”. Así, algunhas das temáticas
deste ano serán o emprendemento consciente, a saúde mental, a
economía social, as tecnoloxías accesibles ou a innovación social.
Ademais
dos relatores principais, como a estadounidense Gitanjali Rao
(primeira nena da historia portada da revista Time), Pepe
Martín (director executivo de Minimalism), Carlota Corzo (Fundadora
de Lázzaro) ou o mexicano Paco Ayala (Fundador de Horto Roma Verde),
xa se poden consultar na plataforma en liña do evento todas as
charlas e mesas redondas que levarán a cabo durante as 5 xornadas.
Seguindo
a liña de edicións anteriores, onde acudiron o coñecido David
Aguilar, coas súas próteses de LEGO, ou o Premio Princesa de Girona
Guillermo Martínez, co seu proxecto Axúdame 3D, a
organización deu un paso máis para potenciar a figura das e dos
makers como “axentes do cambio social”. Así, a axenda
incluirá o que sería o primeiro hackathon de
tecnoloxías de apoio en colaboración con ONCE, ASPACE Coruña e
COGAMI, onde se xerarán proxectos en código aberto para resolver as
necesidades das persoas diversas funcionalmente.
En
canto ao resto de contidos, a organización apostou por potenciar
máis que nunca a cultura maker, o que se traducirá, nas súas
palabras, “en ter a maior oferta de obradoiros de todas as edicións
e contar cos expositores máis interactivos”. Entre eles destacan
os obradoiros relacionados coa cultura urbana como os de stencil
art, mug paint, cap paint ou parkour, que estarán
liderados por Vella Escola; os de ciencia e tecnoloxía, onde o
equipo de VermisLAB levará a cabo os de biotech, VR
(Realidade Virtual) ou electrónica; os videoxogos coa xa habitual
Game Maker Jam; ou os relacionados coa inclusión, como o
obradoiro de masillas de prototipado ou o de premedores adaptados.
O
evento é totalmente gratuíto tanto en formato en liña, como nas
xornadas de industria e educación en formato presencial, que se
celebrarán as mañás dos días 2 e 3 de xuño respectivamente. As
xornadas abertas dos días 4 e 5 de xuño, que se desenvolverán de
10 da mañá a 8 da tarde, terán un custo de 6 € en formato
presencial, salvo para menores de 6 e maiores de 65 anos que serán
gratuitas.
A 8ª
edición da Maker Faire Galicia celebrarase no Museo Gaiás e vén da
man de Designthinking.gal, contando co apoio da Xunta de Galicia, o
Concello de Santiago, a Fundación Cidade da Cultura e a Asociación
para o Progreso da Dirección (APD). Realízase coa colaboración da
Fundación Española para a Ciencia e a Tecnoloxía (FECYT) -
Ministerio de Ciencia e Innovación.