Mallando no Android sortea un Optimus G para festexar o seu terceiro aniversario

No día de onte Mallando no Android estaba de celebración, pois nesa mesma data -1 de xullo- pero de hai tres anos, nacía un proxecto con feitura de blogue que abrollaba dende a bagaxe de Mallando na e-ira. Mallando no Android aparece como un espazo no que se dá conta de toda a actualidade que ten a ver con Android, sempre en galego, dende novas até análises de terminais e aplicacións, pasando pola cobertura dos principais eventos do sector.
Estamos perante unha web feita por galegos, pois os responsábeis de Mallando no Android son un grupo de mozos da nosa terra: Iago Varela Martínez (coordinador/editor), Luís P. Castelo (redactor), Vítor Vázquez Vázquez (redactor), Isaac Manteiga (redactor), Agos Reigosa (redactor), Álex Alfaya (redactor) e Fernando Real (redactor). Asemade, esta web conta de cando en vez coa colaboración de Xabier Crespo, Alberto Ruibal, Ismael Reyes, Álvaro Mouteira e Sebastián Barbeito.
Indo ao miolo da festa, para conmemorar o terceiro aniversario do seu nacemento, Mallando no Android decidiu organizar un sorteo en colaboración con LG, e agasallar ao premiado/a cun Optimus G, cunha pantalla de 4,7 polgadas, procesador de 4 núcleos a 1,5 GHz, 2 XB de RAM, 32 XB de memoria interna, cámaras de 13 e 2 megapíxeles... un teléfono do que xa se falara no blogue en cuestión. Emporiso, para participar no sorteo deste Optimus G cómpre empregar as diferentes redes sociais: Twitter, Google+ ou Facebook, sumando unha participación por cada unha delas, até un máximo de tres. Amais, quen responda de xeito acertado ás preguntas propostas nas últimas semanas, sumará até dúas participacións extra, facendo un máximo total de cinco.
Para coñecer máis polo miúdo as regras e condicións do concurso de Mallando no Android, cómpre visitar a súa web e, logo de ter pasado polas redes sociais, deberase cubrir un formulario cos datos requiridos.