Manuel Casal prepara unha guía da Rede para os colectivos sociais e culturais da nosa terra
venres, 26 de abril do 2013
Manuel Casal Lodeiro, responsábel de iniciativas
tan pioneiras (tecnolóxica e socialmente falando) como Fillos.org
(se cadra unha das primeiras redes sociais con categoría de seu,
neste caso da emigración galega), está a presentar estas días un
novo proxecto de seu para dar corpo a un manual práctico para
asociacións de tipo social e cultural que desexen afondar nas
potencialidades do universo dixital no camiño da “transformación
social”. O proxecto materializaríase a través dunha campaña
de crowdfounding (colaboración en rede de pequenos pero
múltiples fornecedores de financiamento) na
plataforma Verkami. O manual resultante deste apoio colectivo
iría destinado, curiosamente, a apoiar á colectividade.
Este recurso de ida e volta chamarase Guía de
Internet para as organizacións sociais e constituirá, a todas
luces, un recurso de primeira liña para axudar ás nosas comunidades
a tirar o máximo proveito das redes para promoverse, informar dos
seus traballos, traballar ombro con ombro con outras comunidades e,
tamén, facer máis comunidade. Segundo
informa Casal nunha completa reportaxe en Galicia Confidencial, o
medio dixital ten múltiples potencialidades para transformar o
sistema social e político. Podemos ver sinais tódolos días, coa
actividade de plataformas como Change.org ou con iniciativas
concretas contra determinados abusos de poder político ou
empresarial, algunhas cales, rematan por conseguir os seus obxectivos
grazas aos apoios recadados (millóns de sinaturas de todo o mundo,
repercusión nos medios, etc). O proxecto de Casal, participativo,
cooperativo e común, viría a solucionar en parte o ensarillado da
ausencia actual de orzamentos: “Moitas veces os nosos colectivos
non teñen orzamento para contratar un asesoramento profesional e
estes erros rematan por lastrar a efectividade das súas accións
online. Con esta guía pretendo orientar a todas as persoas
implicadas nestas accións sociais e culturais en Internet,
complementándoo cun asesoramento básico personalizado aos que opten
por ese tipo de recompensa na súa achega ao proxecto",
sinala.