Mar Pereira fai un chamamento para seguir sumando talento feminino á carreira dixital

xoves, 18 de novembro do 2021 S. P.

Mar Pereira, directora de AMTEGA, nunha imaxe de arquivo

Esta semana (até maña) arrincou en Santiago a terceira edición do Congreso de Mulleres do Sector Público. Nel participou a directora da Axencia para a Modernización Tecnolóxica de Galicia (AMTEGA), Mar Pereira, quen destacou este xoves 18 a “necesidade” de atraer talento dixital, en xeral, e feminino en particular, aos sectores tecnolóxicos chamados a liderar a transformación da nosa economía.
Pereira interveu no marco da mesa titulada As mulleres en sectores masculinizados: sector TIC, enxeñarías e Forzas e Corpos de Seguridade do Estado.
A directora da axencia salientou as “excelentes” perspectivas de inserción laboral nos sectores tecnolóxicos, e puxo en valor que o emprego foi quen de medrar en máis dun 23 por cento entre 2015 e 2020 e, “de seguir a evolución actual, estes sectores crearían en Galicia máis de 4.500 postos de traballo ata 2025”. Porén, recoñeceu a falta de perfís profesionais femininos: “Soamente o 20 por cento dos 3.660 empregos creados no pasado quinquenio foron mulleres.
Ademais, dixo, “nas empresas de tecnoloxía soamente o 1% das mulleres ocupa postos directivos fronte ao 5,8% de homes”.
Atendendo ás funcións que desenvolven nas empresas, Pereira explicou que só o 14,7% están dedicadas a funcións tecnolóxicas fronte ao 49,3% de homes. E caso de funcións non especificamente tecnolóxicas dixo que “a tendencia invértese e a presenza de mulleres (16,2%) supera aos homes (13%)”.
Mulleres con formación superior STEM en Galicia
Pereira engadiu quen en Galicia a porcentaxe de tituladas nas carreiras denominadas STEM “é moi inferior ao de titulados nas especialidades máis tecnolóxicas (16,8% de mulleres) e nas enxeñarías (38,5%)”. Porén, engadiu, “en Matemáticas a proporción de tituladas é moi próxima a dos titulados e nas ciencias naturais, as mulleres son maioría (66,1%)”. A directora de AMTEGA tamén explicou que a inserción laboral de ambos xéneros é moi semellante (de máis do 83% en ámbolos dous casos) e que os salarios das mulleres superan aos dos homes cando son tituladas nas carreiras en que son minoría (Tecnoloxías e Enxeñarías), mentres quedan por detrás en Ciencias e Matemáticas.
“Hai maior porcentaxe de mulleres tituladas STEM traballando nos sectores de hostalaría, outros servizos, administración e primario”, apuntou, engadindo que “mentres tanto, máis porcentaxe de homes atopan acomodo laboral nas industrias xerais, no sector TIC e nas actividades de servizos profesionais”.
Actuacións para o fomento das vocacións STEM entre as nenas
A directora da Axencia para a Modernización Tecnolóxica de Galicia referiuse na súa intervención aos esforzos acometidos pola Xunta de Galicia para fomentar as vocacións STEM entre as nenas.
Pereira destacou tres liñas chave para captar e reter talento, aumentar o recoñecemento social das profesións tecnolóxicas; promover o papel de dirección e liderado destes profesionais e deseñar proxectos atractivos profesionalmente cun elevado compoñente de impacto económico e social
Respecto ás actuacións en marcha referiuse, en concreto, ao Plan para a Promoción do Talento Dixital de Galicia (DigiTalent), e a actuacións como o programa Girl STEAM ou a elaboración do documental Mulleres na Informática: Marxe de Erro.
DigiTalent, dixo Pereira, identifica como ámbito de especial relevancia a loita contra a fenda dixital de xénero, e neste senso, aposta por dar visibilidade aos roles e referentes femininos no sector TIC e fomentar entre as máis novas as vocacións científico-tecnolóxicas.
Tamén destacou que no verán de 2021 desenvolveuse un ano máis o programa Girl STEAM en colaboración coa Asociación Galega de Software Libre (AGASOL). “Trátase dunha actividade que busca empoderar a nenas e mozas dando unha maior visibilidade ao rol que desemprega a muller no sector tecnolóxico”, informou salientando que a iniciativa, adaptada ao formato dixital pola situación socio-sanitaria derivada da COVID-19, “permitiu ás máis novas e novos achegarse, en remoto, a seis mulleres referentes a través de conversas gravadas nas que relataban experiencias da súa traxectoria profesional”.
Recentemente presentouse tamén o documental Mulleres na informática: Marxe de erro, que contribúe a reducir a fenda de xénero na nosa comunidade, e visibiliza o papel que xogan as mulleres tecnólogas no sector tecnolóxico, salientou Pereira, destacando que “a través dos seus relatos, as cinco protagonistas amosan a necesidade e o aporte de valor que supón a incorporación do talento feminino na carreira de informática, rompendo coas ideas preconcibidas que afastan ás máis novas de optar por estudos STEAM”. Esta actividade enmárcase no convenio de colaboración asinado por AMTEGA e o CPETIG.

PUBLICIDADE