Mar Pereira lembra que a Axenda Dixital 2020 investiu máis de 324 millóns de euros
xoves, 13 de xullo do 2017
A xornada de estrea do
Encontro Red.es que se está a celebrar na Universidade Internacional
Menéndez Pelayo (UIMP) no Pazo da Magdalena en Santander,
poñendo o foco na cooperación en servizos e a transformación
dixital, contou con presenza galega. Máis polo miúdo, a
participación da directora da Axencia para a Modernización
Tecnolóxica de Galicia (AMTEGA), Mar Pereira, quen fixo un repaso
polos obxectivos conseguidos e por conseguir da Axenda Dixital de
Galicia 2020. Segundo explicou, esta Axenda investiu máis de 324
millóns de euros, 51 deles de capital privado, entre 2015 e 2016
para contribuír ao crecemento económico e á mellora social da
Comunidade aplicando as vantaxes da tecnoloxía.
Pereira tamén fixo fincapé na posta en marcha en
2012 da propia axencia AMTEGA como “instrumento estratéxico e
executivo para impulsar a modernización da administración pública
e o desenvolvemento económico e social de Galicia”. E engadiu:
“Desde a Axencia estase a levar a cabo a a segunda estratexia
dixital do actual Goberno autonómico, a Axenda Dixital de Galicia
2020 (ADG2020), baixo un modelo de cooperación e participación
continua de representantes do sector empresarial, do sector TIC, das
institucións públicas e da sociedade civil”.
Amais do devandito, a titular de AMTEGA destacou a
importancia do sector sector TIC galego no desenvolvemento da Axenda
Dixital (salientando que en 2015 o sector experimentou “o maior
incremento en número de empresas dos últimos cinco anos”) e máis
as vantaxes da transformación dos servizos públicos. Segundo
informou, esta adaptación ao dixital dos servizos das institucións
“xa acadou fitos en Galicia, como un importante incremento dos
servizos online ou a posta en marcha todas as pezas do
expediente xudicial electrónico”.
Respecto á conectividade, sinalou que xa Galicia
“ten en marcha un Plan para levar as redes ultrarrápidas a toda a
Comunidade”. E engadiu: “As primeiras actuación en marcha están
dirixidas a dotas a máis de 80 polígonos industriais de redes de
ata 350Mpbs e unha liñas de axudas para que empresas illadas do
rural teñan acceso a internet de máis de 30 Mbps”.