María García recibirá o Premio Proxecto Fin de Carreira do CPEIG na Noite da Enxeñaría en Informática
venres, 27 de maio do 2016
O Colexio Profesional de Enxeñaría en Informática
de Galicia (CPEIG) vén de fallar o
Premio Proxecto Fin de Carreira, que na oitava
edición da Noite da Enxeñaría en
Informática distingue a
ferrolá María García García polo proxecto Estratexias
transaccionais para lograr High-Perfomance en aplicacións JEE7. O obxectivo
do traballo é maximizar a eficiencia dos sistemas de transacción garantindo a
integridade e consistencia dos datos. O Premio está dotado con 1.000 euros e mediante
o galardón, o ente colexial busca achegarse ao colectivo máis novo de
enxeñeiros e defender as vantaxes da colexiación, ademais de estimular o
traballo dos estudantes de Enxeñaría en Informática.
O proxecto parte dunha aplicación que actualmente
usan a diario os traballadores dunha aseguradora alemá, e que mostra un
comportamento lento e mesmo chega a bloquearse cando a usan moitos usuarios á
vez. Na busca dunha mellor eficiencia, o traballo consiste en illar o problema
da aplicación e crear un prototipo máis sinxelo que represente a aplicación e o
problema en cuestión. O obxectivo é, tras o estudo de diferentes estratexias
transaccionais, poder refactorizar o código da aplicación orixinal coa más
axeitada e resolver así o problema.
María García estudou Enxeñaría Informática na Universidade
da Coruña e xa nos últimos anos da carreira, grazas ao programa Erasmus, se
trasladou a Alemaña para realizar un mestrado internacional en Tecnoloxías da
Información na Universidade de Stuttgart. Esta estadía e o coñecemento do idioma
facilitoulle o desenvolvemento do Proxecto Fin de Carreira nunha empresa alemá
especializada en consultaría IT e enxeñaría do software.
Segundo ela mesma conta, a súa inquedanza por
emprender os seus propios proxectos tróuxoa de volta a España, para instalarse
en Barcelona e converterse “en co-fundadora, enxeñeira informática e emprendedora
a tempo completo de Kobabunga: unha
plataforma online de avaliacións e opinións sobre empresas, onde os
traballadores axudan coas súas experiencias a futuros empregados a atopar unha
empresa que os namore”.
A
galardoada recibirá o premio o vindeiro día 3 de xuño no Hotel-Monumento
San Francisco, en Santiago de Compostela, na oitava edición da Noite da Enxeñaría en Informática de
Galicia. O evento representa un punto de encontro entre todos os colexiados
e conta cunha destacada participación de cargos empresariais, institucionais e
políticos.