Mario e os Rabbids unen forzas nun xogo para Nintendo Switch

martes, 13 de xuño do 2017 Marcus Fernández

Durante o E3 Ubisoft confirmou un xogo que xa se tiña filtrado nos últimos meses, e que mesturaría as franquías dos Rabbids coa de Super Mario, Mario + Rabbids Kingdom Battle, que sitúanos no Reino Champiñón despois de que un misterioso vórtice o puxese do revés e trouxese aos Rabbids para unir forzas con Mario, Luigi, Yoshi e a Princesa Peach para devolver o mundo ao seu estado orixinal.
Este xogo que chegará a Nintendo Switch o 29 de agosto a un prezo de 59,99 euros (na súa edición estándar, estando tamén dispoñible unha edición para coleccionistas que inclúe a banda sonora, 12 naipes e unha figura de 16,5 centímetros dun Rabbid vestido de Mario) convidaranos a solucionar numerosos quebracabezas nunha aventura na que derrotar a inimigos impredicibles en combates por quendas e afrontar retos cooperativos.
En Mario + Rabbids Kingdom Battle contaremos con 8 personaxes (4 de Mario e 4 Rabbids) con cadansúa personalidade dos que podemos controlar a un equipo de 3 para superar os desafíos máis explosivos coa grande vantaxe de poder gozar do xogo tanto no televisor como en mobilidade.

Tráiler de Mario + Rabbids Kingdom Battle estreado no E3

PUBLICIDADE