Marta Gómez Palenque visitou Gradiant para coñecer os seus avances en tecnoloxías sostíbeis

O Centro Tecnolóxico Gradiant, con sede en Vigo, recibiu na mañá do pasado 12 de febreiro a visita de Marta Gómez Palenque, directora xeneral de Calidade e Avaliación Ambiental do Ministerio para a Transición Ecolóxica e o Reto Demográfico. Durante a súa visita, Marta Gómez Palenque tivo a oportunidade de coñecer os últimos desenvolvementos e proxectos de innovación tecnolóxica que se están levando a cabo no centro, cun enfoque cara á sustentabilidade.
En particular, púxose o foco en iniciativas do centro tecnolóxico orientadas a sectores clave como a defensa e seguridade, o sector primario ou a industria, co obxectivo de implementar tecnoloxías intelixentes que contribúan de maneira efectiva á loita contra o cambio climático.
Durante o seu percorrido polas instalacións de Gradiant, a directora xeral puido coñecer de preto como o centro aplica solucións tecnolóxicas cun impacto real para optimizar recursos e reducir o impacto ambiental en diversas áreas produtivas.