MeLiSA organiza este sábado o seu segundo roteiro de Abeancos.gal
xoves, 1 de agosto do 2019
MeLiSA,
a Asociación de Usuarios de Software Libre da Terra de Melide vai
organizar este 3 de agosto a
segunda edición do seu Roteiro de Abeancos.gal, destinado a
poñer en valor o rico patrimonio cultural da comarca de orixe da
asociación, amais de mostrar os obxectivos e metodoloxías do
proxecto Abeancos, un
catálogo dixital aberto e participativo de elementos patrimoniais
presentes na área na devandita bisbarra. “Todos eles”, explican
as entidades responsábeis de Abeancos.gal,
“documentados, clasificados e xeolocalizados con mapas libres”.
A
nova cita será como dixemos este sábado 3 de agosto en horario de
10.00 a 17.30 horas. A través deste roteiro, os participantes terán
a oportunidade de visitar varios elementos xa catalogados no proxecto
e coñecerán como se fai este labor de catalogación con outros
obxectos, lugares ou monumentos que estean pendentes de rexistrar.
Tamén terán ocasión de afondar en proxectos libres de localización
como OpenStreetMap e abordar conceptos sobre cartografado empregando
ferramentas dixitais.
Estes
son os elementos patrimoniais que se visitarán:
·
Muíño do Estreito
·
As pontellas de arriba
·
Nacemento do Furelos
·
Cruceiro de Brañas
·
Iglesia de Brañas
·
Castro da Armada
·
Pasais das Barxas
·
Fonte das Barxas
·
Muíño das Barxas
O
roteiro é de balde, de dificultade pequena no que poden participar
adultos e nenos a partir de 7 anos (acompañados dun adulto), pero é
necesaria a inscrición previa enviando un correo a: info@melisa.gal.
Máis
detalles do proxecto
Abeancos.gal
foi presentado en maio de 2016 no Museo da Terra de Melide e da man
de MeLiSA en colaboración co Museo da Terra de Melide, que
facilita a consulta a través da Internet de parte do catálogo
patrimonial co que conta a área da cerna de Galicia, empregando
contidos con licenza libre.
Polo que respecta ao nome do proxecto, Abeancos.gal, é unha
recuperación da denominación da antiga delimitación da Terra de
Melide. O catálogo repártese nas categorías de arquitectura civil,
arquitectura relixiosa, arquitectura industrial, arquitectura
popular, elementos arqueolóxicos, paisaxe mítica, cruceiros e
pontes (obtendo os 2 últimos unha categoría de seu debido á súa
significación individual).
Cada elemento recolle unha ficha descritiva onde consta a súa
categoría, o seu estado de conservación, a súa localización, a
súa descrición, unha fotografía e incluso un ficheiro coas lendas
naqueles elementos que teñen algunha asociada. Este elementos tamén
están localizados xeograficamente a través do mapa libre
OpenStreetMap, á vez que todos estes contidos seguen unha política
de datos abertos.