Medio cento de xuristas de catro países afondan na UVigo nos retos dixitais do Dereito

Medio cento de xuristas de catro países (Brasil, España, Portugal e Italia) debaten este luns e martes (26 e 27 de maio) no IV Foro Xurídico Ibero Brasileiro os “desafíos inéditos” que supón para o Dereito a transformación dixital que atravesa a sociedade actual. Por cuarto ano consecutivo, esta cita converte á Facultade de Ciencias Xurídicas e do Traballo da UVigo en punto de referencia das relacións entres xuristas españois, portugueses e brasileiros.
No arrinque do evento coincidiron a secretaria xeral da Universidade de Vigo, a tamén xurista María José Bravo Bosch; o decano da facultade, Francisco José Torres; a reitora da Universidade do Estado de Bahia, Adriana Marmori, e os directores do foro: os docentes da Universidade de Vigo, Juan Antonio Hernández Corchete e María Hylma Alcaraz Salgado, e o profesor da Universidade de Bahia Clodoaldo Silva da Anunciação.
Tal e como explicaron os responsables do encontro, as tecnoloxías emerxentes como a Intelixencia Artificial, o recoñecemento de emocións por parte de máquinas ou a automatización de decisións “están a alterar a maneira na que as persoas interactúan entre si, traballan e se relacionan”, e “o Dereito non pode permanecer estático ante este novo escenario, moi polo contrario cumpre un rol central: dar forma, contido e límites ás novas situacións xurídicas que emerxen no espazo dixital”.
Os organizadores do encontro sinalaron que o Dereito “debe brindar un marco normativo que permita que a innovación tecnolóxica conviva coa protección de dereitos e principios fundamentais”.
Engadiron tamén que “o espazo dixital non é un territorio sen regras, senón un ámbito que require ser pensado e estruturado xuridicamente, para que a tecnoloxía se poña ao servizo das persoas e non ao revés”, en palabras de María Hylma Alcaraz.
Nesta edición o foro acolle once mesas de traballo divididas en eixes temáticos -cuestións sociais, administración pública, corrupción, xénero, tributos...- . Serán en total 40 relatorios.
A sesión inaugural correu a cargo do catedrático de Dereito Constitucional da Universidade de Santiago de Compostela, José Julio Fernández Rodríguez, delegado de protección de datos da USC e director do Centro de Estudos de Seguridade, que afondou nos desaxustes entre a normativa de protección de datos e a IA; e de Carlos Eduardo da Silva Camillo, maxistrado do Tribunal de Xustiza de Bahia, que se meteu de cheo nos desafíos que supón a IA para o Dereito Internacional e os dereitos humanos.