Meta cancela o proxecto que pretendía competir coas Vision Pro

Meta Quest Pro foi un visor bastante avanzado, que fracasou comercialmente polo seu elevado prezo

As presentacións das Meta Quest 3 a as Apple Vision Pro foron case consecutivas, dando a impresión de que estabamos ante produtos cunha tecnoloxía moi semellante, pero con orientacións diferentes. Así, Meta orienta o seu visor ao lecer e os videoxogos, buscando un prezo axustado, mentres que Apple deixa os videoxogos de lado e céntrase na produtividade, sen esquecer o consumo audiovisual.
O interese inicial polas Vision Pro de Apple, produto sobre o que non hai dúbidas de que é imposible que calle no mercado co seu prezo actual, levou a que dende Meta explorasen a posibilidade de retomar as súas Meta Quest Pro, lanzando un modelo con moita máis resolución para así pórse á altura técnica do visor de Apple, pero vese que aprenderon ben a versión do seu anterior modelo Pro (que foi un rotundo fracaso polo seu elevado prezo) e agora transcende a través de The Information que o proxecto de lanzar un competidor directo das Vision Pro está cancelado.
Aseguran que Meta tería dado instrucións aos traballadores da división Reality Labs de cesar o traballo no ambicioso visor esta mesma semana. Este produto, coñecido internamente baixo o nome en clave La Jolla, tiña como obxectivo de lanzamento o ano 2027, e tamén contaría con pantallas micro OLED de ultra alta resolución, o que dispararía o seu prezo.
Pese a que a fiestra de tempo é bastante ampla, dende Meta consideraron que as pantallas necesarias para estar á altura do dispositivo de Apple farían imposible fabrican un visor que puidese comercializarse por menos de mil dólares, que é a cantidade máxima que estiman que permiten unhas boas vendas.
Meta mantería nas súas previsións o lanzamento dunhas Meta Quest 4 no ano 2026, cun prezo semellante ao que actualmente teñen as Quest 3, que lembremos que é 7 veces inferior ao do visor da compañía da mazá, de aí que a distancia que separe os produtos sexa disparatada, sendo precisos bastantes anos para que poida ser viable un visor de realidade estendida de alta resolución ao alcance do grande público.